La XDLA recuerda la importancia del sector audiovisual y denuncia la perda de fondos pola falta d’oficialidá

“Son munchos los puestos de trabayu que xeneraría una industria dedicada a esos menesteres”, asegura la Xunta pola Defensa de la Llingua Asturiana (XDLA), que recuerda la importancia que tendría’l sector audiovisual “pa la normalización y normativización” del asturianu. D’igual forma denuncia la perda de fondos cola Llei Audiovisual nueva pola falta d’oficialidá del idioma.

“Amás de dexar al asturianu ensin espaciu en plataformes como Netflix, HBO, Disney o Amazon, les productores d'esta tierra nun van poder acceder a les partíes presupuestaries que l'Estáu va crear pa fomentar la producción audiovisual nes llingües oficiales”, esplica. L’alcuerdu d’ERC col PSOE p’apoyar los Presupuestos Xenerales del Estáu pal 2022 afita una cuota del 6 por cientu en llingües oficiales pa les plataformes y un impuestu del 5 por cientu a les producciones del que se va dedicar el 10 por cientu pa incentivar los proyeutos nestos idiomes.

La XDLA rescampla que “Asturies, otra vuelta pola falta d'oficialidá, va perder la oportunidá de poder acceder a eses partíes” y critica “la pasividá” del Executivu d’Adrián Barbón, “que nun negoció col Gobiernu central o'l PSOE que la llei fixera referencia tamién a les llingües propies que nun son oficiales, como l'asturianu”. Tamién que tenga “la reforma del Estatutu d’Autonomía paralizada”, polo que torna a pidir “a los grupos parllamentarios favorables a la reforma qu'entaínen col procesu pa que l'asturianu sía oficial enantes de la entrada en vigor de la Llei Audiovisual”.

Nesi sen critica que se tea dexando de llau n’Asturies “la importancia de sectores como l'audiovisual y, sobre manera, la industria del doblaxe pa la normalización y normativización d'una llingua, amás del subtituláu nuna sociedá como l'asturiana ensin alfabetizar nel so idioma. Son munchos los puestos de trabayu que xeneraría una industria dedicada a esos menesteres”.

Situación na TPA

El coleutivu cívicu nun escaez que la TPA “sigue marxinando los conteníos nel nuestru idioma nuna situación qu'incumple sistemáticamente la Llei d'Usu y la Llei de RTPA”. “Lleva ensin doblar conteníos al asturianu dende'l 2017 y nos últimos años emitió en Navidá películes infantiles doblaes al castellanu en Madrid o Barcelona. Quier dicise, dedicó'l presupuestu a ufiertar los mesmos conteníos que yá se puen ver en televisiones como Clan, Boing, Neox o Cartoon Network”, llamenta.

“Ye'l momentu d'un cambiu y de tener accesu a conteníos audiovisuales de toa triba nel nuestru idioma, amás de crear puestos de trabayu gracies al sector audiovisual y l'asturianu. En Netflix tamién, pero sobre too en TPA, porque asina lo diz la llexislación que güei ta vixente ensin falta d'aprobar nenguna Llei Audiovisual”, sentencia la XDLA.

Na semeya, protesta pasada de la XDLA frente a la sede de la RTPA.