La XDLA quier xente comprometío col idioma al frente de la RTPA

|

Pide a Podemos, Izquierda Xunida y Foro que presionen a la FSA-PSOE nesi sen.

"Énte la negociación inminente pa designar los xestores de la RTPA, la Xunta pola Defensa de la Llingua Asturiana (XDLA) recuerda a los grupos políticos que'l parllamentu salíu de les elecciones pasaes escoyó a Javier Fernández presidente cola condición, ente otres, de 'incrementar la presencia de la llingua y la cultura asturianes' na radiotelevisión pública. Pa garantizar la execución d'esti compromisu parllamentariu, la XDLA demanda que los futuros xestores de la RTPA –director xeneral, Conseyu d'Alministración y Conseyu de Comunicación– sían persones comprometíes colos derechos llingüísticos", espresa nun comunicáu la organización cívica, que "fai un llamamientu espresu a les formaciones polítiques qu'apostaron nos sos programes electorales por una RTPA al serviciu de la normalización llingüística –Podemos, IX y Foru– pa que trabayen con esti oxetivu".

La XDLA entiende que, col pasu los años, la presencia del idioma nel ente públicu de comunicación va p'atrás, pa lo que pon d'exemplu la programación del Día de la Nación Asturiana: "mentes que nel 2014 llegó a emitise un 30 por cientu nel nuestru idioma, anguaño l'usu del asturianu quedó namás na repetición d'una película doblada que yá s'emitiera en xineru del 2015". L'ausencia d'iniciatives nueves nel campu del doblaxe y la presencia nula del idioma n'informativos y retresmisiones deportives lleva a la organización a demandar "un cambiu nos xestores de la radio y la televisión pública, porque hasta'l momentu mostraron una incapacidá manifiesta pa echar a andar unos medios de comunicación públicos capaces a vertebrar social, cultural y llingüísticamente Asturies. Too ello a pesar de los sueldos más que curiosos, sacaos del bolsu de tolos ciudadanos, que lleven tolos meses".

Contador Estadistiques