L’ésitu d’audiencia de ‘L’alzada’ lleva a la XDLA a insistir nun cambiu na direición de RTPA

El primer capítulu de la serie documental n’asturianu de Ramón Lluís Bande sobre la comunidá vaqueira algamó un 10,5 por cientu de cuota de pantalla. Demanda la necesidá d’incorporar a un direutor xeneral “favorable a los derechos llingüísticos”.

Emitida n’horariu d’audiencia máxima’l martes pasáu, axuntó a 48.000 asturianos frente al televisior, algamando una cuota de pantalla (share o porcentaxe de persones que tan viendo’l programa sobre’l total que tien la televisión prendida nesi momentu) del 10,5 por cientu, superando asina la media de la canal, que s’asitia anguaño al rodiu d’un 6 por cientu, según los datos que manexa la Xunta pola Defensa de la Llingua Asturiana (XDLA). Ello situó a ‘L’alzada’ como’l programa más vistu del día na TPA, anque con un share inferior al informativu del meudía y al western de pela tarde.

La serie documental, de cuatro capítulos –el segundu va emitise mañana a les 22.10 hores dientro del programa ‘Asturias.doc’–, narra la vida de trés families mientes l’alzada del 2014. Baxo la direición de Bande, Xosé Antón Fernández ‘Ambás’ rescata los testimonios de la comunidá vaqueira mientres la treshumancia. Un trabayu mui cuidáu,  nel que’l nuesu idioma ye protagonista, qu’algamó l’interés de l’audiencia, al igual qu'asocede con tolos programes que s'emiten en llingua asturiana.

“Estos resultaos muestren la necesidá d'un cambiu al frente de la direición de la radiotelevisión pública, porque nestos años pudimos ver que mentes l'equipu de dirieción va per un llau, la sociedá asturiana –que tien apegu al so territoriu y a la so cultura– va per otru”, afirma la XDLA.

Comprometíu pa cola cultura asturiana

La organización cívica entiende que’l perfil afayadizu pal direutor xeneral nuevu que tendrá l’ente públicu de comunicación ha der ser el d’una persona “comprometida cola cultura asturiana y que nun se niegue a desarrollar la llexislación vixente –Estatutu, Llei d'Usu y Llei de RTPA, testos que reconocen el papel de la radiotelevisión pública nel procesu de recuperación del patrimoniu llingüísticu del país–”.

 “Hasta'l momentu vimos una directiva que nun quixo normalizar l'usu del idioma na programación y que namás lu arrequexó pa los usos humorísticos y diglósicos, ensin nengún procuru pa cola so corrección y calidá. Mesmamente, nun s'emitió programación infantil n'asturianu – porque dos series en diez años nun ye emitir programación infantil n'asturianu, ye una anécdota ensin continuidá–, a pesar de que nel restu de territorios estes emisiones foron el meyor complementu pa la presencia del idioma nes escueles. Ye'l momentu de que los partíos muestren el so compromisu col idioma propiu, porque namás una RTPA onde l'usu del asturianu y del gallego-asturiano sía dalgo normal –sumao a una presencia digna del idioma en toles etapes educatives– va poder poner frenu al alarmante retrocesu de falantes que viven les llingües tradicionales d'Asturies”, afirma la XDLA.