La XDLA asegura que l’anulación del Plan de Carreño amuesa que “la Llei d’Usu ye insuficiente”

|
Javier Fernández Lanero y Maximina Fernández UXT manifestación oficialidá

“La oficialidá ye l'únicu camín” pa la Xunta pola Defensa de la Llingua Asturiana (XDLA) pa evitar situaciones como l’anulación del Plan de Normalización Llingüística de Carreño. Entiende que la sentencia de recién d'un xulgáu de Xixón “vuelve a demostranos que'l marcu xurídicu actual, la Llei d'Usu, ye insuficiente”.

El coleutivu cívicu entiende qu’esta anulación, que se suma a una previa del Tribunal Superior de Xusticia, “amás d'una clara intromisión na autonomía municipal, ye una muestra más de que la oficialidá ye l'únicu camín posible p'asegurar la plena validez xurídica de la política llingüística llevada alantre polos conceyos”. La mesma establez l'anulación del Plan de Normalización porque “se proyeuta hacia la totalidá de l'actividá municipal y amás en rellación cola xeneralidá de los ciudadanos que se relacionen cola mesma”, lo que pa la XDLA ye venir a dicir “que l'asturianu nun val pa falar de too, que namás se pue usar pa determinaes coses y que la xente que quiera nun pue rellacionase col so conceyu na so llingua materna”.

“Ésta nun ye más qu'una pinga que va enllenando'l vasu d'una campaña persecutoria y supremacista contra les poques coses que s’intenten facer por visibilizar l'asturianu. Ye una muestra más de despreciu, de falta de respetu y d'intentu d'imposición d'unes idees retrógrades a los que nun piensen como ellos. Los que faen de la intolerancia la guía de la so actividá política quieren una España monollingüe y monocolor. Son los mesmos que coles sos argumentaciones tramposes nieguen que’l asturianu pueda usase o estudiase con normalidá por nun ser oficial, al empar qu'afirmen que nun pue ser oficial hasta que nun s’use con normalidá”, critica la organización cívica, que considera que namái con oficialidá los conceyos van poder actuar “con autonomía pa una cosa tan normal como favorecer l'usu de la llingua propia y pa que la ciudadanía qu'asina lo quiera pueda usar l'asturianu ensin problemes”.

Manifestación el día 21

La XDLA sigue sumando apoyos de cara a la manifestación ‘L’asturianu llingua oficial ¡agora!’ convocada pa les 12 hores del día 21 na Estación del Norte (RENFE) d’Uviéu. Conceyos, como Ḷḷena, Noreña y Carreño, coleutivos y sindicatos como CC OO y USO sofiten esta marcha en defensa de los derechos de los falantes d’asturianu y gallego-asturiano, llista a la que se sumaron tamién SUATEA y UXT.

Na semeya, los cabezaleros d'UXT y FETE-UXT, Javier Fernández Lanero y Maximina Fernández, apoyando la convocatoria del 21-A.

Contador Estadistiques