La Vuelta aporta a les carreteres asturianes con Herrada como líder

|
Jesús Herrada

Del vienres al domingu, con dos finales d'etapa, en Les Praeres y en Los Llagos.

Jesús Herrada (Cofidis), ganador de dos etapes na Vuelta a Asturies (2012 y 2015), sal de Candás como líder de La Vuelta tres formar parte ayeri d'una escapada qu'aportó a meta con 9 minutos de ventaya sobre'l grupu de favoritos y del maillot colloráu de la carrera, el británicu Simon Philips Yates (Mitchelton-Scott), agora segundu na xeneral a 3 minutos y 22 segundos del manchegu. Nun va tener fácil salir d'Asturies como primeru, anque la moral que da llevar el xerséi na decimotercer etapa d'una grande nun deporte tan épicu como'l ciclismu da pie a esperar sorpreses nestes trés etapes pel país.

La primera tien comienzu en territoriu asturianu, anque fina en lleonés, en contreto en La Camperona. Pa mañana ta la estrena de Les Praeres tres partir de Cistierna, mentes que'l domingu La Vuelta quier conmemorar el triple centenariu de Cuadonga cola xuba a Los Llagos nuna etapa que va salir de La Ribera y na que'l pelotón va facer dos pasos per El Fitu.

Emplegu de la toponimia non oficial

Tres pasar per Galicia, onde La Vuelta emplega la toponimia oficial, les trés etapes asturianes van tar marcaes por utilizar na so fueya de ruta nomes de llugar que yá nun esisten oficialmente, como 'Rioseco', 'San Martín del Rey Aurelio' o 'Covadonga'. Esti casu nun va dase tampoco nin n'Euskadi nin en Catalunya, onde la carrera emplega los topónimos vascos y catalanes, los oficiales, como ye lo lóxico.

Esta situación llega cola permisividá de l'alministración asturiana, que pese a los intentos anunciaos dende la Direición Xeneral de Planificación Llingüística y Normalización y y el costu que supón pa les arques públiques el pasu de la carrera pel país, sigue permitiendo l'usu de topónimos castellanizaos, yá non oficiales tres el proceseu de recuperación de la toponimia tradicional entamáu pol propiu Gobiernu.

Contador Estadistiques