El Gobiernu presenta les etapes asturianes de La Vuelta, carrera que sigue ensin emplegar la toponimia oficial

‘Ribera de Arriba’, ‘Covadonga’ o ‘Pola de Laviana’ son los topónimos yá derogaos que sigue emplegando la organización de La Vuelta cola permisividá del Gobiernu. Esti vienres presentáronse n'Uviéu les trés etapes asturianes de la ronda ciclista esti 2018.

La toponimia asturiana ye la única que nun se respeta d’ente tolos territorios con llingua propia peles que va pasar la carrera, yá que la gallega, vasca y catalana sí s’emplega con normalidá. Un asuntu que nun ye menor, yá que’l pasu de La Vuelta per Asturies cuesta perres a les alministraciones públiques del país, que nun faen por respetar los nomes de llugar qu’elles mesmes aprobaron.

Ye llamativo, sicasí, que la organización sí use’l topónimu asturianu nún de los finales inéditos de la ronda, Les Praeres, nel conceyu de Nava. Ésta va ser la segunda etapa de les trés previstes nel país, con una primera’l 7 de setiembre ente Candás y La Camperona (númberu 13 de la carrera).

Pal Día Nacional d’Asturies, los ciclistes van salir del país vecín, en concreto de Cistierna, pa finar en Les Praeres, mentes’l que’l día 9 van percorrer la distancia ente La Ribera y los Llagos de Cuadonga. Depués de les etapes asturianes va haber una xornada de descansu de cara a encarar la selmana cabera de La Vuelta, que seguramente va decidise nos Pirineos.

Na presentación d’estes etapes, celebrada nel Eurostars Hotel de La Reconquista acudieron el conseyeru d’Emplegu, Industria y Turismu, Isaac Pola; el direutor xeneral de Comerciu y Turismu, Julio González Zapico; el direutor de La Vuelta, Javier Guillén; l’alcaldesa de Carreño, Amelia Fernández López; l’alcalde de Nava, Juan Cañal; l’alcalde de La Ribera, José Ramón García; l'alcalde de Llanera, Gerardo Sanz; y el teniente d’alcalde de Cangues d’Onís, Gonzalo Suero.

Na semeya, González Zapico, Guillén, Pola, Fernández López, Cañal, García, Suero y Sanz.