La versión n'asturianu de la Xulia de Strindberg llega a Cangas

El grupu teatral "Margen" representa güei miércoles a les 20:30h en Teatru Conde Toreno de Cangas del Narcea la versión n'asturianu de "Xulia" clásicu del autor nórdicu August Strindberg. La torna del testu corrió a cargu de Pablo Texón, y nos papeles principales intervienen Verónica Gutiérrez, José Antonio Lobato y Ángeles Arenas.

"Xulia y Xuan taben condergaos a alcontrase desque elli, siendo un neñu probe, esguilaba peles muries pa robar mazanes na güerta'l conde y elli, ente los matos de freses, espiaba a la neña Xulia... ¿Nun ye esto Asturies?". Asina lo reivindica Teatro Margen na presentación de la versión n'asturianu del clásicu "Fröken Julie" del suecu August Strindberg. La realización d'esta versión, vien d'un encargu que-y ficiere l'Academia de la Llingua a Teatro Margen con motivu del Día de les Lletres Asturianes del 2002. Márgen fizo daquella una versión curtia de la obra que resumía tola trama nuna media hora. L'encargu convenció a la veterana compañía teatral de que l'asturianu tenía posibilidaes dramátiques más p'allá del teatru costumista y decidióse a facer el montaxe de la obra entera.

La trama de la obra asítiase en Suecia a últimos del sieglu XIX, anque la mesma compañía sorraya que l'acción podría treslladase guapamente a un ambiente asturianu, y céntrase nel namoríu y la tensa rellación que va crease dempués d'ello ente una moza de la decadente aristocracia rural sueca con ún de los sos criaos, qu'aspira a convertise en burgués al traviés d'un negociu d'hostelería. Lo comprometío social y moralmente de la obra llevó a que la censura danesa namás diere de pasu una representación na estrena de la obra en 1889, y el testu tuvo d'esperar hasta'l 1906 pa poder representase nos escenarios suecos. 106 años se precisaron pa poder vela n'asturianu, y ello gracies a la interpretación de Verónica Gutiérrez, José Antonio Lobato y Ángeles Arenas.