La UABRA abre los cursos de la octava edición

|
La UABRA abre los cursos de la octava edición

Cangas del Narcea acueye un añu más, y yá van ocho, la Universidá Asturiana de Branu (UABRA). Alredor de 115 persones, ente estudiantes y profesores, tomen parte nesta edición, que llega tres un alcuentru del presidente Javier Fernández cola direutiva entrante de l’Academia de la Llingua Asturiana (ALLA).

A les 13 hores d’esti llunes quedó inaugurada la UABRA con un actu nel que tuvieron presentes Fernando Padilla, direutor xeneral de Planificación Llingüística y Normalización; Xosé Antón González Riaño, presidente de l’Academia de la Llingua Asturiana; María Cristina Valdés, direutora de la UABRA; Francisco José Borge, vicerrector d’Estensión Universitaria y Proyeición Internacional de la Universidá d’Uviéu; y Laura Álvarez García, teniente d’alcalde de Cangas del Narcea. L’eventu tuvo llugar na Casa Cultura Palaciu d’Oumaña, onde tamién abre les sos puertes la esposición ‘El Quixote ilustráu’, de Juan Hernaz.

Universidá d’Uviéu y el Conceyu de Cangas collaboren na organización de la UABRA, pola que van pasar dende güei y hasta’l día 11 d’agostu unos 90 alumnos en dalgunos de los cursos ufiertaos, quedando la inmensa mayoría d’ellos agospiaos na Escuela-Hogar de la villa en réxime de pensión completa. Como n’años anteriores, tolos cursos ufiertaos salieron alantre dada la demanda.

En total son siete los que s’importen, destacando l’Elemental de Llingua Asturiana, l’Avanzáu de Llingua Asturiana y el de Gallego-asturiano (Primera fase), que tienen un llargor de dos selmanes. Llueu desendólquense los Cursos d’Afondamientu Cultural y Llingüísticu, con una duración d’una selmana, siendo los primeros n’impartise’l de ‘Capacitación pa la Traducción al Asturianu’, con Marta Mori al frente y la participación nel programa informativu de la direutora de la UABRA Cristina Valdés, Alberto Fernández Costales y Héctor García Gil, y el de ‘Nueves teunoloxíes na educación’, con David Melendi como maestru y Xulio Berros como convidáu.

El llunes viniente va ser el turnu de ‘Cantares, bailles ya instrumentos musicales asturianos’, dirixíu por José Ignacio Suárez García y con Héctor Braga, Covadonga González Muñiz, Xosé Antón Fernández Martínez ‘Ambás’, Ramsés Ilesies Fernández y Llorián García Flórez como profesores, y ‘Averamientu nel cine n’asturianu’, empobináu por Próspero Morán y cola actriz María Cotiello y el realizador Pablo A. Quiroga como participantes.

Xeres complementaries

Amás de los cursos y la esposición, mientres estos díes van celebrase en Cangas conferencies nel salón d’actos de la Escuela-Hogar y conciertos nel Teatru Toreno, actividaes abiertes a cangueses y estudiantes. La primera va tener llugar mañana, a les 19 hores nel salón d’actos de la Escuela-Hogar -, y va xirar sobre ‘El Desterrado. Poder, historia e relato nel Alto Navia’, a cargu de José Antonio Álvarez Castrillón, Doctor n’Historia y profesor ayudante Doctor del Departamentu de Ciencies de la Educación de la Universidá d’Uviéu.

El miércoles va actuar Corquiéu a les 22.30 hores, qu’anda celebrando los sos venti años de trayeutoria y prepara discu nuevu, y el xueves, nel horariu habitual, Xairu López, Nicanor García y Fran Allegre, de l’Asociación Cultural Faceira, van participar na mesa redonda ‘Lliteratura y movimientu de vindicación en Lleón’. ‘Ciudá Astur o acabar con Asturies’, de José Alba, Doctor en Ciencies Económiques y Empresariales y profesor titular del Departamentu d’Economía aplicada de la Universidá d’Uviéu, va centrar la conferencia del martes 8.

Una actuación de Tuenda’l miércoles, y la charra ‘L’AVE a Asturies: serviciu públicu y ecoloxía’, de Paco Ramos, voceru d’Ecoloxistes n’Aición d’Asturies, el xueves, van ser les últimes xeres complementaries de la UABRA.

Conceyu con Javier Fernández

La direutiva nueva de l’ALLA, encabezada pol presidente nuevu, González Riaño, aconceyó la selmana pasada con Javier Fernández, presidente d’Asturies. Nella tratáronse dellos temes, como la financiación de la institución académica o los datos del avace de la III Encuesta Sociollingüística d’Asturies.

Fernández comprometióse a aumentar les partíes pa l’ALLA, que descendieron un 20 por cientu nos años últimos, nel casu de poder sacar alantre los presupuestos con un entendimientu cola izquierda, y a aprobar el decretu qu’afite’l calter públicu de la institución. D’igual manera señaló’l so interés en tar presente en dalgún de los actos públicos que s’entamen dende l’ALLA.

Contador Estadistiques