La UABRA abre les sos puertes

Dende esti llunes y hasta’l 14 d’agostu más d’un centenar de persones participen nos cursos qu’entama l’Academia de la Llingua Asturiana (ALLA) en Cangas del Narcea en collaboración col Conceyu y la Universidá d'Uviéu.

Esta mañana inauguróse de manera oficial la sesta edición de la Universidá Asturiana de Branu (UABRA), actu nel que tuvo presente la direutora nueva de los cursos, la decana de la Facultá de Filosofía y Lletres María Cristina Valdés; la presidenta de l’ALLA, Ana María Cano; la direutora xeneral de Política Llingüística, Ana María Fueyo; l’alcalde del Conceyu de Cangas del Narcea, José Víctor Rodríguez; y el vicerrector d'Estensión Universitaria de la Univesidá d’Uviéu, Vicente Domínguez. El llugar escoyíu foi la Casa Cultura de Cangas del Narcea.

Enantes, los alumnos que participen esti añu na UABRA, con residencia na Escuela-Hogar de Cangas, iniciaben les clases na Escuela Oficial d’Idiomes. Güei daben entamu los tradicionales ‘Cursu Elemental de Llingua Asturiana’ y ‘Cursu Avanzáu de Llingua Asturiana’, amás del ‘Cursu de Gallego-asturiano (primeira fase)’, destináu a maestros d’Infantil, Primaria y Secundaria, qu’esti añu va durar los doce díes de la UABRA.

D’igual forma, comenzaben los dos primeros cursos de los d’Afondamientu Cultural y Llingüísticu’, esto ye, ‘Capacitación pa la traducción al asturianu’, a cargu de la direutora de la UABRA, y ‘Más presees d’aplicación escolar na rede’, coordinada por David Melendi. Pa la segunda selmana van desendolcase ‘Xestión cultural n’Asturies: creando cultura al traviés de los medios’, con Isabel Hevia al frente y ‘Averamientu al cine n’asturianu’, a cargu de Loreto Díaz Suárez, nel que va participar l’actriz María Cotiello, ente otros profesores, nel programa formativu.

Actividaes abiertes

Col oxetivu d’involucrar a la población de Cangas na UABRA, mientres les dos selmanes próximes van entamase delles actividaes abiertes, como charres, conciertos o una esposición. Ésta última inauguróse tamién güei na Casa de la Cultura ‘Palaciu d’Oumaña’ y lleva’l nome de ‘Equí y n’otru tiempu’, basada na cinta de Ramón Lluis Bande.

Mañana va celebrase la primer de les cuatro conferencies previstes, que va llevar el títulu de ‘¿De qué falamos cuando falamos de rexeneración democrática?’, a cargu de Miguel Ángel Presno, profesor titular del departamentu de Derechu Públicu-Área de Derechu Constitucional de la Universidá d’Uviéu. Les siguientes van ser ‘Peñerando’l xenoma na gueta de xenes de cáncer y muerte de sópitu’, por Xosé Antón Suárez Puente, profesor titular de Bioquímica y Bioloxía Molecular de la Universidá d’Uviéu (xueves); ‘Les nueves téuniques d’investigación arqueolóxica’, por Margarita Fernández Mier, profesora titular d’Historia Medieval de la Universidá de Lleón (martes 11); y ‘Gastronomía con llingua propia’, en formatu taller, por Lluis Nel Estrada, cocineru, comunicador y especialista en productos artesanales de ‘40 Primaveres. Gastronomía y Comunicación’ (xueves 13). Toles charres dan aniciu a les 19 hores

No que respeuta a les actuaciones musicales, va tocar esti miércoles Alienda y, el siguiente, La Tarrancha. Los conciertos van dar aniciu a les 22.30 hores nel Teatru Toreno.