Alonso va acudir a la entrega de los diplomes de la UABRA

La so antecesora n’Educación y Cultura nun asistiera nunca al pieslle oficial de la Universidá Asturiana de Branu (UABRA). L’actu va desendolcase esti xueves nel paraninfu de la Universidá d’Uviéu.

Xunto con Genaro Alonso van participar nel actu l’alcalde de Cangas del Narcea, José Víctor Rodríguez;  la direutora de la UABRA y recién nomada direutora xeneral d’Universidaes y Investigación , Cristina Valdés; la presidenta de l’Academia de la Llingua Asturiana (ALLA), Ana María Cano; y el rector de la Universidá d’Uviéu, Vicente Gotor. Los cinco, que van intervenir en llingua asturiana, encargaránse de repartir dende les 19 hores d’esta tarde los diplomes y certificaos a los más de cien alumnos que tomaron parte na UABRA ente’l 3 y el 14 d’agostu en Cangas.

La presencia del conseyeru d’Educación y Cultural nel pieslle oficial de la UABRA ye d’especial significáu tres trés años d’ausencia d’Ana González en tolos actos que tuvieren que ver cola llingua asturiana, salvo la inauguración de la UABRA del 2012, onde prometiera la especialidá docente que nun algamó na llexislatura, y los actos de presentación de la Selmana de les Lletres Asturianes. Nel so llugar solía acudir la direutora xeneral de Política Llingüística, Ana María Fueyo, o, en poques ocasiones, el vicenconseyeru de Cultura, Alejandro Calvo.