La tercer votación pa escoyer presidente del país va celebrase’l martes

El Plenu va principiar a les 12 hores. El PP critica que Sanjurjo lu convocare con 24 hores d’antelación y Foro pide un alderique nuevu pa conocer el programa de Gobiernu de Javier Fernández tres l'alcuerdu de la FSA-PSOE y IX.

Toles previsiones dan a Javier Fernández como presidente d’Asturies pa los cuatro años próximos tres l’alcuerdu que la FSA-PSOE algamó con IX, un pautu nel que la oficialidá del asturianu quedó fuera y nel que'l tema llingüísticu resumióse en trés midíes curties. D’esta forma, a los 14 diputaos socialistes habría que sumar l’apoyu de los 5 de la coalición, algamando un total de 19.

Na segunda votación na Xunta Xeneral pa escoyer presidente, la popular Mercedes Fernández sumó 14, los 11 propios y 3 de Foro que forzaron un sorprendente empate. Un posible apoyu de Ciudadanos, qu’anunció la so astención, dexaría la votación nun 19-17, lo que daría la presidencia a Javier Fernández. Sicasí, el líder de Podemos Emilio Léon dexó caer la posibilidá de ‘ceder’ votos al PP pa provocar un empate nuevu y obligar al socialista a “negociar en serio”. Esta midida va decidilo esta tarde’l Conseyu Ciudadanu, anque Podemos nun enseñaría les sos cartes hasta la propia votación.

Crítiques poles formes

Pedro Sanjurjo, presidente de la Xunta Xeneral, anunció güei a los grupos la convocatoria del Plenu pa mañana al meudía, lo que xeneró critiques del PP y Foro. Mercedes Fernández acusólu de “partidista” por esperar a que les bases d’IX confirmaren l’apoyu a la FSA-PSOE pa la so celebración, amás de pola forma de facelo, con un teletipu y ensin convocar la Xunta de Voceros.

Pela so parte, Cristina Coto reclama un alderique nuevu na Cámara pa que Javier Fernández presente’l so programa de Gobiernu tres l’alcuerdu con IX cola fin de conocelu pa valorar el votu.