La Tarrancha presenta ‘El ferreru’, tema adelantu del so discu nuevu

La banda de ska y fusión La Tarrancha ta trabayando nos cantares del que va ser el so discu próximu, ‘Baillando con llokes’, col que celebren los sos quince años de carrera. Como adelantu, presenten un tema d’adelantu con videoclip de nome ‘El ferreru’.

Nacida tres la xuntanza de les bandes Fai un Flai y Papá Pitufo/Zemba, La Tarrancha cumple trés llustros faciendo baillar a los sos siguidores y d’ehí’l nome del so discu nuevu, que va comenzar a grabar agora. El recopilatoriu ‘Rock’n’Llingua’, xunto con Skontra, Oi! N’ast, Milicia Astur, Güerku y Falkatrúa, foi onde se pudieron sentir los dos primeres dos temes d’estudiu, ‘Planta’ y ‘Presente indictativu del verbu nuntrabayar’.

Depués llegó, nel 2006, la maqueta ‘EXIT-encia’ y el discu ‘Qlt?’, pa siguir con ‘Ö-3-3’, ‘Mecigayuska’, el so proyeutu ‘Mezillingües’ y ‘Elefantes na cacía’. Toos ellos con un denominador común: l’autoedición y la so distribución de baldre pela rede.

En ‘Baillando con llokes’, la banda anuncia “pura fusión, ensin fae-y ascos a nengún estilu musical, ensin mieu a purismos, nin a la necesidá de tener una etiqueta pa lo que se fai, y como en ‘Elefantes na cacía’, con muncha más fuerza y enerxía” que nos primeros trabayos. Un bon exemplu ye ‘El ferreru’, cantar grabáu en Tutu Estudios cola produción de Sergio Rodriguez y Sergio Díaz Montes, y la collaboración del multi-instrumentista Daniel Álvarez, col qu’amuesa un adelantu de lo que vamos poder atopar nél.