La Tarrancha celebra los sos 15 años col conciertu de presentación del discu ‘Baillando con llokes’

Xixón ye’l llugar escoyíu por La Tarrancha pa presentar el so discu nuevu, ‘Baillando con llokes’, yá disponible na rede, con un conciertu esti sábadu na sala Acapulco que va servir tamién pa celebrar el decimoquintu aniversariu de la banda. L’actu va tar acompañáu por una folixa tarranchera nun llugar entovía por confirmar.

‘Baillando con llokes’, quintu trabayu en solitariu del grupu, grabóse en Tutu Estudios cola produción de Sergio Rodriguez y Sergio Díaz Montes y yá ta disponible nes rede YouTube, iTunes, Spotify y GooglePlay dende esti xueves 20. A partir del sábadu, nel propiu conciertu, va poder mercase de forma física.

Pa esti trabayu La Tarrancha contó cola collaboración de Daniel Alvarez, multi-instrumentista sobradamente conocíu nel panorama folk pola so participación en distintes bandes y un habitual collaborador del grupu. Tamién formaron parte d'él Nel Sanchez, ex componente del grupu, al acordión; Sil Fernandez (Delagua), a la voz; el palentín Arturo Rodriguez (Vallarna), cola dulzaina castellana; los gaiteros Illan Escalada, Dani Naredo y David Muñiz; y les pandereteres de Nun Tamos Toes, colos coros.

Creative Commons

Un total de trece cortes conformen esti discu nuevu “de pura fusión, ensin face-y ascos a nengún estilu musical; ensin mieu a purismos, nin a la necesidá de tener una etiqueta pa lo que se fai, y como nel anterior discu, ‘Elefantes na cacía’, con muncha más fuecia, distorsión y enerxía que nos sos primeros trabayos”, espliquen dende La Tarrancha. Les influencies y los estilos que s'aprecien nel discu van dende'l funk y el swing al punk-rock y al rock and roll; dende la música asturiana a los aires balcánicos o castellanos, con toques de ragga, rap y el siempre presente ska.

“Un discu bailladeru unes veces; duru y contundente, otres; y duce y melódicu n'otres”, con lletres “que falen de lo cotidiano, de la necesidá de recuperar l'allegría, de les inxusticies, de la necesidá de garrar conciencia…; en definitiva d'eses pequeñes y grandes coses que nos afecten a toes”. Como ye vezu, La Tarrancha espubliza ‘Baillando con llokes’ con llicencia semi-llibre Creative Commons.

El conciertu de presentación y la fiesta 15 aniversariu de la formación musical que nació de la xuntanza de les bandes Fai un Flai y Papá Pitufo/Zemba, va comenzar el sábadu a les 23 hores, con apertura de puertes a les 22 hores. El preciu de la entrada ye de 5 euros anticipada y de 7, na puerta.

Los puntos de venta son los siguientes: sidrería Canteli, en Xixón; Chigre Ochobre y CSA La Semiente, en L’Entregu; Llar La Llegra, n'Uviéu; L’Abellugu, en Mieres; Cá Nando, n’Urbiés; Cuévano, en La Pola Siero; El Cafetón, n'Avilés (hasta güei); y La Bodega y FloristeríaVidaflor, en Villaviciosa. Tres l’actuación, onde tamién van poder sentise temes clásicos de La Tarrancha y na que ta prevista la participación de collaboradores, va entamase una folixa tarranchera nun llugar que va confirmase nes hores próximes.