La selmana nos mercaos

Anque yá llevaben tiempu garrando fuercia, el pesu del preciu del petróleu y la cotización de la moneda europea nos mercaos bursátiles acusóse más esta selmana. Al pieslle del vienres pasáu afectolu muncho la xuba del preciu del barril de petróleu, mientres que la xuba del euru ta estragando les esportaciones europees. Los inversores siguieron recoyendo beneficios anque delles bolses como la de Madrid caltuvieron un pieslle selmanal en positivo.



Les estadístiques europees nun foron bones por culpa de la debilidá económica d´Alemania y Francia. La inflación francesa medró hasta'l 0,5%, mui penriba les espectatives, ello xunta una cayida de la producción industrial del 0,9%. N´Alemaña'l datu d´inventariu minorista foi d´un probetayu 0,7%. Ente les estadístiques del otru lláu del Atlánticu destaca'l xorrecimientu del 0,3% de los precios de producción USA.


Les bolses europees tovieron una selmana complicada tamién polos febles resultaos empresariales, amenazaos pola perda de competitividá arreyada a la xuba del euru. El vienres pasáu trancaron en negativo les bolses de Francfort y de París. En Wall Street l´índiz Dow Jones tuvo una cayida del 0,06% hasta los 9.674,68 puntos mentantu'l tecnolóxicu Nasdaq medró un 0,18% mangándose nos 1.915,31 puntos. Les previsiones de General Electric nun-yos prestaron a los inversores y el mal ambiente empresarial viose n'anuncia d´IBM de da-yos un "añu sabáticu" a bien de los sos trabayadores. Nel lláu positivu, el bon comportamientu de los resultaos de Yahoo! dio-y esperances al castigáu sector d´Internet. Nun ye esta la única puntucom que ta faciéndolo bien esti añu, en cuantes que e-Bay dió anuncia nun hai muncho d'una xuba del beneficiu.


La Bolsa de Madrid trancó'l vienres con una cayida del Ibex-35 del 0,63% hasta los 6.974,70 puntos. Nel conxuntu de la selmana pasada, el selectivu medró un probetayu 0,75%. Permala selmala pal Grupu Telefónica que tiró pa baxo pel mercáu al dar anuncia d´una operación de recompra d´acciones propies con un presupuestu de 4.000 millones d´euros a repartilos en tres años. El vienres, valores como BBVA, SCH y el sector elléctricu foron los que tuvieron mayores perdes. Nel llau de les ganacies destaquen les empreses constructores, Inditex, Abertis y Mapfre. La noticia de la selmana pasada foi la intención de los dueños del Bancu Atlánticu de vendelu. Los principales accionistes del bancu ye'l Arab Banking Corporation, que ya nun tien nengún interés en siguir na entidá. Ente los posibles compradores destaca´l Barclays anque tamién tan na puya la Caixa Xeral (grupu Banco Simeón) o'l Bancu Sabadell.

La OPEP demostró que nun ta pol llabor d´una política de precios estable alrodiu los 22 dólares, y asina'l crudu Brent llegó al másimu dende que finare la guerra d´Iraq. De fechu, el xueves de la selmana pasada'l preciu del petróleu en Llondres medró un 5% y a la fin trancó la selmana en 30,6 dólares barril. A los analistes nun-yos presten estos precios porqu'amenacen la recuperanza económica d´Estaos Xuníos. El casu ye que los economistes anuncien que les baxes reserves enerxétiques norteamericanes y les previsiones d´un importante crecimientu nel consumu de calefacción esti inviernu nun va facer posible que´l preciu d´esta materia prima cotice perbaxo los 30 dólares.

La renta fixo nun tuvo una bona selmana pasada onde la rentabilidá de los bonos alemanes baxó hasta el 4,185%. Les duldes continúen en terrén norteamericanu y l´apueste sobre´l dólar ya nun ye tan nidiu. Énte la debilidá del dólar l´euru tira p´arriba hasta mangase nos 1,185 unidaes.