La seleición UEFA comienza l’asaltu al títulu contra Galicia y Cantabria

Depués de rozar el títulu na fase estatal de la edición anterior, Asturies comienza en casa una edición nueva de la Copa de les Rexones UEFA con Galicia y Cantabria como rivales na primer fase. Los dos partíos van poder siguise en TPA en llingua asturiana.

Luis Arturo encabeza esta etapa nueva de la seleición asturiana non profesional, sustituyendo nel bancu a Xiel, agora nel Avilés. L’ex entrenador del Vetusta tien el llistón mui altu, yá qu’Asturies proclamóse subcampiona de la edición anterior, la de 2015-2016 –celébrase cada dos años–, tres perder con Castilla y Lleón por 1-0 tres una competición inmaculada na que los asturianos llegaron al partíu decisivu ensin encaxar nin un solo gol.

Les lesiones, como les d’última hora de Piniella, Álvaro García y Pelayo Pedrayes, que provocó la llamada de Diego Nuño (L’Entregu), César Suárez (UP Langreo) y Diego (CD Covadonga), tamién van condicionar al conxuntu asturianu nesta primer fase, na que va tener como rivales a les seleiciones de Galicia y Cantabria. Asina, ésta queda compuesta por David González, Jairo Cárcaba, Iván Fernández y Borja Fernández, del Marino; Fanjul, del CD Tuilla; Dani Corgo y Gael, del Llanes; Adrián Torre y Cris Montes, del UP Langreo; Jaime y Mikel Busto, de CD Covadonga; y Javi Meana y Jairo Acevedo, de L’Entregu.

El primer partíu del grupu A va celebrase mañana a les 12 hores nel Sergio Sánchez II, d’El Berrón, énte un combináu gallegu entrenáu por Pichi Lucas. A la mesma hora’l sábadu, en Ganzábal, van xugar Galicia y Cantabria, mentes qu’Asturies va vese les cares cola seleición cántabra’l domingu al meudía n’El Bayu. Los trés choques son d'entrada llibre pal públicu.

El campeón d’esta fase va pasar a la intermedia, na que se va cruzar nuna eliminatoria a ida y vuelta col del grupu D, conformáu por Murcia, Comunitat Valenciana y Andalucía. De pasar, llegaría a la fase final, na que’l ganador llucharía n’Ucrania del 2 y 7 d’ochobre pol títulu continental nel grupu 6 colos representantes llocales y los d’Azerbaixán y Finlandia.

Na edición anterior, la décima, Zagreb (federación croata) superó na final por 1-0 al nomáu ‘Region 2’ (federación irlandesa), disputada n’Estambul. Castilla y Lleón superó la ronda intermedia continental y na definitiva quedó encuadrada col combináu irlandés.

La primer fase, n’asturianu en TPA

Los partíos de la seleición asturiana UEFA van poder siguise en direuto en TPA en llingua asturiana. El choque de mañana con Galicia va retresmitilu Fernando García de Dios, y el del domingu con Cantabria, Miguel Fernandi, siempre con Nacio González nos comentarios.