La seleición asturiana UEFA rozó'l títulu

|

Aguantó l'empate na final énte Castilla y Lleón, tres ganar a Ceuta, hasta'l minutu 79.

Nun pudo ser. Pese a llegar a la final estatal del domingu de la Copa de les Rexones UEFA ensin encaxar nin un gol en tola competición, Asturies vio como Alberto Mato, xugador del Villaralbo, vía la puerta defendida por Adrián Torre y daba prauticamente'l títulu y el derechu a participar na fase europea de la competición a Castilla y Lleón.

Los de Xiel tuvieron sicasí opciones de trunfu, sobre manera na primer parte, nuna final igualada na que la seleición UEFA vecina malpenes tuvo ocasiones nidies de gol. El tantu de Mato dende la frontal del área punxo la competición en bandexa a Castilla y Lleón, que sentenció'l partíu na prolongación por medio d'Ayrton al colocar el 2-0 definitivu nel marcador.

Semifinales con Ceuta

Dos díes enantes, Asturies superaba tamién nel Estadio Municipal de Puertollano a Ceuta por 1-0 gracies a un tantu del xugador del Condal, Jairo Cárcaba, nel minutu 30 del choque. Pela so parte, Castilla y Lleón dexó pel camín a Castilla-La Mancha na tanda de penaltis (3-1) tres finar el partíu ensin goles.

Contador Estadistiques