La selección d'Asturies ganó en Bohemia

La selección asturiana d'aficionaos sigue alantre na copa UEFA de rexones d'Europa depués de ganar ayeri pola mínima a Bohemia Central, actual campeona de la competición, en partíu que se xugó na República Checa. El futbolista del Caudal de tercera división Mini foi l'autor del gol asturianu, que llegó bien ceo, namás tres minutos depués d'entamar el xuegu. La selección asturiana nun salía de favorita, asina que l'equipu de Baragaño decidió armase bien atrás y intentar garrar col pie cambiáu a los checos xugando a la contra, cosa que consiguieron primero de lo que pensaben. Lo que vieno dempués foi un aguantar a los de casa, que, anque apretaron, nun foron quien a crear munches ocasiones de gol.