La Rioja y Castilla-La Mancha xúnense a Asturies, Galicia, Castilla y Lleón, y Aragón na reclamación d’un modelu nuevu de financiación

|
La Rioja y Castilla-La Mancha xúnense a Asturies, Galicia, Castilla y Lleón, y Aragón na reclamación d’un modelu nuevu de financiación

Zaragoza foi la sede d’un conceyu nuevu de presidentes pa reclamar al Gobiernu estatal un modelu de financiación nuevu. Al grupu que conformen Asturies, Aragón, Castilla y Lleón, y Galicia, sumáronse La Rioja y Castilla-La Mancha, territorios que roblaron una declaración institucional conxunta.

El  puntu 1 de la mesma señala como necesario “defender como prioritaria la definición del modelo nuevu de financiación autonómica, cuestión qu’ha d’abordase de forma inmediata pa, d’esti mou, poder garantizar la prestación de los servicios fundamentales por parte de les comunidaes autónomes”, polo qu’encamienta al Executivu de Pedro Sánchez “continuar y avanzar nos sos trabayos nuna propuesta de modelu qu’ha de ser oxetu d’un consensu multillateral nel senu del Conseyu de Política Fiscal y Financiera, nel que se tengan en cuenta les particularidaes, necesidaes y posiciones de toles Alministraciones afeutaes”. Al empar, les seis comunidaes manifiestan el so esmolecimientu pol calendario eleutoral de los próximos años “que podríen añadir más incertidume a unos alcuerdos yá de por sí complexos d’algamar”, esixendo dar cumplimientu nesti mesmu exerciciu l’acuerdu del 17 de xineru del 2017 na  materia.

Na declaración tamién se fai referencia a la situación demográfica d’estos territorios, que xuntos suman 4.463 conceyos, el 55 por cientu del total y el 52,8 por cientu de la superficie estatal, pero qu’axunten el 21 por cientu de la población. “Poro, instamos al Gobiernu d’España a que, en cumplimientu del acuerdu adoptáu na Conferencia de Presidentes de xineru del 2017, presente la propuesta de ‘Estrategia Nacional frente al Reto Demográfico’ y sía aldericada nel marcu de la Comisión creada al efeuto, a la que, como comunidaes integrantes del Foru de Comunidaes Autónomes pol Cambiu Demográficu (FREDD) aportamos les nueses propuestes y prioridaes de forma activa”.

Na semeya, Emiliano García-Page (Castilla-La Mancha), Javier Fernández (Asturies), Javier Lambán (Aragón), Alberto Núñez Feijóo (Galicia), José Ignacio Ceniceros (La Rioja) y Juan Vicente Herrera (Castilla y Lleón) nel momentu de roblar la declaración institucional conxunta de Zaragoza.

Contador Estadistiques