Asturies, Aragón, Castilla y Lleón, y Galicia apuren al Gobiernu un modelu de financiación nuevu

|
Javier Fernández, Juan Vicente Herrera, Alberto Núñez Feijóo y Javier Lambán

Los presidentes d’Asturies, Aragón, Castilla y Lleón, y Galicia roblaron na capital lleonesa una declaración institucional na qu’apuren al Gobiernu estatal un modelu de financiación nuevu. Los trés territorios mineros tamién asoleyaron un documentu conxuntu nel que reclamen un Pautu d’Estáu pola Enerxía.

Los socialistes Javier Fernández y Francisco Javier Lambán, y los populares Juan Vicente Herrera y Alberto Núñez Feijóo, celebraron ayeri un alcuentru de trabayu onde la financiación autonómica yera’l tema central. Asina, los cuatro gobiernos alcordaron una declaración institucional na que tresmiten al Executivu estatal “la necesidá concluyente de defender como prioritaria la definición del modelu nuevu de financiación autonómica”, pa lo qu’encamienten a “continuar y avanzar nos sos trabayos nuna propuesta de modelu qu’ha de ser oxetu d’un consensu multillateral nel senu del Conseyu de Política Fiscal y Financiera, nel que se tengan en cuenta les particularidaes, necesidaes y posiciones de toles Alministraciones afeutaes”.

Nel casu d’estos territorios, les problemátiques qu’atopen, y que demanden que se valoren en mayor midida a la hora d’afitar el repartu nuevu más igualitariu, son principalmente los costos fixos, la orografía, la superficie, la dispersión, la baxa densidá, la baxa tasa de natalidá o l’avieyamientu y sobreavieyamientu de la población. “Nós defendemos esti plantegamientu porque nos paez el más próximu a los valores consitucionales y porque tenemos una determinada idea d’España”, apuntó Javier Fernández tres l’alcuentru.

Defensa de los recursos autóctonos

De manera paralela, Asturies, Aragón, y Castilla y Lleón roblaron otra declaración institucional na qu’esperesen qu’estes trés comunidaes “tán atravesando una situación de gravedá estrema derivada de los procesos de reestructuración de la minería del carbón y del sector de la xeneración llétrica con carbón autóctonu, cola consiguiente repercusión negativa nes sos economíes y despoblación d’estes rexones”. Tres especificar el compromisu de los trés gobiernos contra’l cambiu climáticu, reclamen “la necesidá d’algamar un Pautu d’Estáu pola Enerxía qu’afita un oxetivu de mix enerxéticu y de xeneración llétrica de futuru, con mayor presencia d’enerxíes renovables, y que defina’l camín de la necesaria transición enerxética hacia’l mesmo, compatible cola defensa d’un aprovechamiento coherente de los recursos autóctonos”.

Asina, consideren necesario “establecer nuevamente un procedimientu de despachu preferente pa les centrales qu’utilicen carbón autóctonu” y “imprescindible que les centrales térmiques de carbón sigan operatives”, falando del 2030 como fecha hasta la que, al menos, pueden continuar abiertes tres la mengua d’emisiones frutu de les inversiones feches hasta agora. Nel documentu tamién se solicita flexibilidá na devolución de les ayudes al pieslle de les compañíes mineres “pa que les empreses viables puedan continuar operatives más allá del 2018”.

Na imaxe, Fernández, Herrera, Núñez Feijóo y Lambán. Semeya obra d'Armando Álvarez.

Contador Estadistiques