La responsable de Política Llingüística de Galicia diz que’l gallego-asturianu ye una “llingua nueva”

La Directora Xeneral de Política Llingüística de Galicia Marisol López declaró ayeri nel parlamentu gallegu que, contra les bones rellaciones que tien el so departamentu con Castiella y Lleón, la situación con Asturies ye "mas complicada" porque equí "el Gobiernu y l'Academia de la Llingua decidieron sofitar una llingua nueva que ye'l gallego-asturianu" en cuenta de defender el gallegu.

Les declaraciones de la Directora Xeneral de Política Llingüística de Galicia Marisol López tuvieron llugar ayeri nel marcu d'una comparecencia en Parlamentu de Galicia pa retrucar na Comisión de Cultura a una entruga plantegada pol diputáu del BNG Bieito Lobeira. La entruga del diputáu del BNG trataba sobre les polítiques poles que ta mandándose'l Gobiernu gallegu pa fomentar l'idioma gallegu no que dende Galicia se defende como les sos zones d'influyencia esteriores.

La titular de Política Llingüística gallega esplicó qu'en Castiella y Lleón reciben clas de gallegu cerca d'ochocientos escolinos d'infantil, primaria y secundaria y que ta plantegándose enanchar l'actual conveniu pal enseñu del gallegu y la formación de los profesores inxertando l'idioma gallegu nel sistema educativu de la comunidá autónoma. Sicasí, el casu asturianu ye más abegosu pa la titular de Política Llingüística gallega, que pretende esparder l'enseñu del gallegu pel territoriu del Navia-Eo . López dixo nesti sentíu que "anque la Xunta de Galicia intenta apautar pontes con Asturies, ello nun resulta fácil" reconociendo que "entovía nun se llograron negociar nin siquiera plazos pa llograr alcuerdos concretos" acusando de la falta d'alcuerdu "al enfotu del Gobiernu asturianu y l'Academia de la Llingua de crear una llingua nueva que ye'l gallego-asturianu".

La responsable de Política Llingüística de la Xunta esplicó que se firmaren convenios cola Generalitat de Cataluña pa impartir cursos de gallegu y col Institutu Cervantes pa llevar l'enseñu del gallegu al estranxeru, afirmando qu'ún de los problemes que se-y presenten al enseñu del gallegu fuera de Galicia ye'l de la falta d'oficialidá, polo que'l so departamentu plantégase "l'oxetivu d'intentar llograr esi reconocimientu nestes árees d'influyencia del gallegu".

El diputáu del BNG Bieito Lobeira afirmó na mesma sesión que ye preciso "garantizar el derechu de los alumnos d'estes zones de fuera de Galicia a poder escolarizase en gallegu" defendiendo que se dean pasos pal reconocimientu del gallegu "con subvenciones y incentivos a los medios de comunicación d'eses zones pa qu'empleguen el gallegu".