La Quinta de Selgas será declarada Bien d’Interés Cultural (BIC) como Conxuntu Históricu

El BOPA d’esti llunes asoleyó l’apertura del espediente pa declarar como Bien d’Interés Cultural (BIC) como Conxuntu Históricu la Quinta de Selgas, asitiada n’El Pitu (Cuideiru), procesu que s'allargará per hasta dos años. Patrimoniu plantega la proteición integral de les edificaciones, xardinos y coleiciones del recintu pol so valor históricu y artísticu.

La Quinta de Selgas ye ún de los conxuntos arquiteutónicos, histórico-artísticos y paisaxísticos más importantes del país. Inclúi, amás de la finca principal de La Quinta, na que se integren el palacete construyíu a partir del 1883, los xardinos y el pabellón de tapices; una ilesia-panteón cola so sacristía, la casa rectoral y les escueles, asina como elementos documentales y bibliográficos, y coleiciones artístiques del máximu interés, promovíes y recopilaes polos hermanos Fortunato y Ezequiel de Selgas Albuerne, mecenes y promotores d’importantes obres sociales na segunda metá del sieglu XIX.

Les edificaciones constitúin ún de los conxuntos arquiteutónicos más destacaos d’Asturies dientro d’un estilu eclécticu historicista, anque con pautes bastante fieles al neoclasicismu. No que respeuta a la coleición de pintura rescampla’l cuadru ‘La Anunciación’ d’El Greco, de la que la Conseyería de Cultura, Política Llingüística y Turismu abrió en xineru’l trámite del espediente pa declaralu BIC cola categoría de Conxuntu Históricu.

El procedimientu alministrativo pal de la Quinta de Selgas prollongaráse un máximu de dos años y tendrá que recabar los preceptivos informes de l’Academia de la Historia, la Universidá d’Uviéu y el Real Instituto de Estudios Asturianos (RIDEA). Nel casu de que los dictámenes sían favoratibles, el Conseyi de Patrimoniu va ser l’órganu encargáu d’aprobar definitivamente la declaración.

Propiedá de la Fundación Selgas-Fagalde

El 23 d’ochobre del 1991 Carmen y manuela Fagalde Herce, nueres de Fortunato de Selgas, constituyeron la Fundación Selgas-Fagalde, a la que donaron el conxuntu patrimonia de la familia n’El Pitu. L’oxetivu de la so creación ye conservar el llegáu cultural de la familia, calteniendo’l propósitu col que se concebió, asina como divulgar el so ampliu patrimoniu pa ponelu al serviciu de la sociedá.