La programación navidiega de Corvera ufre conciertos de Dixebra y Santiago

Hai espaciu tamién pa los talleres lliterarios y el teatru esta selmana y la primera del añu.

La programación navidiega de Corvera sigue con un conciertu de Dixebra, esta tarde a les 19 hores, nel Teatru El Llar de Les Vegues con un aforu de 120 persones. La banda, que sigue trabayando no que va ser el so discu nuevu, 'Ente la niebla', va presentar al públicu al so batería nuevu, Sergio Álvarez, que sustituye a Jorge Cambareli, na que va ser la única actuación del grupu nesti 2020 marcáu pola pandemia de COVID-19.

Mañana, al meudía en La Llechera de Cancienes, va ponese'l taller infantil 'Cómo facer un llibru', y el miércoles el Teatru El Llar acueye un conciertu d'Anabel Santiago a les 19 hores. Ente otres munches actividaes, hai que rescamplar tamién la representación de la obra 'Confinaos' por parte de Teatro Carbayín en Cancienes el vienres 8 a les 19 hores.

L'asistencia a toes elles ye de baldre, anque ye necesario acutar plaza al traviés del númberu de WhatsApp 684.617.879, con plazu hasta les 14 hores del día nel que se celebre cada eventu.

Na semeya, el Teatru El Llar.