El teatru popular asturianu y Xosefa de Xovellanos protagonicen dos conferencies

Van desendolcase en Les Vegues cola participación de Sergio Buelga, y Vicente García Oliva y Laura Iglesia, respeutivamente.

Corvera yá celebra la Navidá con una programación especial que güei va tar centrada na cultura del país. El teatru popular asturianu y la figura de la escritora Xosefa de Xovellanos protagonicen la xornada.

Sergio Buelga, direutor de la centenaria Compañía Asturiana de Comedias, va poner a les 17.30 hores una conferencia-espectáculu onde falará de la historia del Teatru Popular Asturianu. Darréu va entamar la representación d'una comedia curtia.

Una hora más tarde va principiar un taller-conferencia pa la reciella sobre Xosefa de Xovellanos, escritora clave na historia de la nuesa lliteratura, a la que García Oliva dedicó esti añu una biografía especial pa neñes y neños xunto cola editorial Pintar-Pintar, que contó con ilustraciones de Ilemi Cuesta. Los dos responsables de la obra van tar acompañaos nesta cita pola actriz Iglesia, que va facer el papel de l'autora ilustrada, y la editora Ester Sánchez.

Pa participar en dambes actividaes, que van tener llugar de baldre nel Centru Sociocultural de Les Vegues, ye necesario unviar enantes un mensaxe al traviés de l'aplicación WhatsApp colos datos al númberu 684.617.879.