24 d’agostu del 1937: créase’l Conseyu Soberanu d’Asturies y Lleón

Esti vienres, 24 d’agostu, cúmplense 81 años de la declaración de soberanía que llevó a la creación del Conseyu Soberanu d’Asturies y Lleón. Esta decisión tomada en plena Guerra Civil nun prestó al Gobiernu republicanu, que la vio como una rebelión.

Na conocida como Casa Blanca, asitiada na xixonesa Plaza del Parchís, firmóse’l 24 d’agostu del 1937 el decretu qu’afitaba la soberanía de los territorios alministraos pol Conseyu Interprovincial d'Asturies y Lleón, entrando en vigor un día depués y espublizándose na prensa’l 26 d’agostu.

L'entós Conseyu Interprovincial proclamóse soberanu tres quedar aislláu’l nuesu país de les posiciones republicanes más averaes, viéndose obligáu a asumir competencies del gobiernu republicanu, como’l mandu del exércitu o la emisión de monedes y sellos.

El yá Conseyu Soberanu foi presidíu por Belarmino Tomás, tando representaes toles organizaciones polítiques y sindicales del bandu republicanu n’Asturies. Sicasí, sobremanera'l PCE, y tamién dirixentes de les Xuventúes Socialistes Unificaes (JSU) ya Izquierda Republicana criticaron la declaración unilateral d'independencia.

La idea del Conseyu Soberanu foi afitada por Belarmino Tomás y la mayoría de dirixentes de la FSA, anque Rafael Fernández, miembru entós de les xuventúes unificaes ente socialistes y comunistes, criticó la decisión. Años depués, nel 1978, ésti convertiríase nel presidente del Conseyu Rexonal d’Asturies, órganu provisional preautonómicu.

Los críticos calificaben la proclamación como perxudicial, antiunitaria y cantonalista y consideraben que yera una escusa pa entamar la evacuación d'Asturies.

L'enfrentamientu col gobiernu de la República

El Gobiernu de València, onde s’asitió l’executivu d’Azaña, vio la declaración de soberanía como una rebelión y el mesmu presidente republicanu escribiría nes sos memories sobre ello: "Belarmino Tomás y la so descomanada ambición de mandu, les fanfarronaes sobre'l triunfu fácil y la direición de les operaciones foron funestes. Eso que llamaron 'Gobiernín Soberano', la formación d'esi Gobiernu estravagante y la so conducta, nun se vio causa más xusta sirvida más torpemente".

El Conseyu cesó al xeneral Gamir Ulibarri, y nomó xefe militar de la so xurisdicción al coronel Prada, y prohibió la salida d'Asturies, ente otres decisiones que censuró'l gobiernu d'Azaña, pero'l puntu de tensión más altu ente los dos gobiernos tuvo llugar cuando dende'l Conseyu Soberanu dirixóse, con una comunicación direuta, a la Sociedá de Naciones.

Actes del Conseyu Soberanu

Nesti enllaz pue consultar el decretu de creación del Conseyu Soberanu d'Asturies y Lleón y nesti otru l'actu de la reunión última, celebrada'l 20 d'ochobre, un día enantes de la entrada de les tropes 'nacionales' en Xixón.