La pandemia sigue en cifres moderaes: 73 casos y una tasa de positividá del 2,88 por cientu

Son 2 positivos más que'l domingu, cuando se raspió'l 5 por cientu que marca la OMS.

La Conseyería de Salú informó de 73 casos nuevos detectaos ayeri. La xornada anterior la cifra quedó en 71, anque con una tasa de positivá dos puntos más alta, del 4,96 por cientu.

Na xornada fixéronse 4.237 pruebes de diagnósticu d'infeición activa, polo que s'asitió nun 2,88 por cientu. La Organización Mundial de la Salú (OMS) afita nun 5 por cientu la llende pa tener controlada la pandemia.

Hai que llamentar la perda de cuatro muyeres de 89, 88, 85 y 78 años, de les qu'una vivía nun centro residencial de mayores. El total de persones que finaron cola enfermedá causada pol coronavirus SARS-CoV-2 asciende a 1.304 al sumar tamién un fináu más en díes previos non contabilizaos.

Ayeri había 308 pacientes hospitalizaos con confirmación o sospecha de COVID-19, a los qu'hai sumar 77 que tán na UCI. Son 19 y 2 menos que'l domingu, de manera respeutiva.