Asturies caltién la tasa de positividá nun 2,9

Esti martes rexistráronse 98 contaxos y finaron 8 persones con COVID-19.

A falta de conocer los datos oficiales de la COVID-19, la Conseyería de Salú comunicó 98 casos nuevos ayeri. Son 25 más que'l llunes, anque se fixeron 1.013 pruebes más de diagnósticu d'infeición activa.

Asina, la tasa de positividá ye cuasi idéntica a la del día anterior: 2,9 y 2,88 por cientu al analizase 5.250 y 4.237 tests, de manera respeutiva. Asturies sigue asina perbaxo del 5 por cientu qu'afita la Organización Mundial de la Salú (OMS) pa tener controlada la pandemia.

Hai que llamentar 8 muertes: cuatro muyeres de 97, 87, 87 y 70 años y cuatro homes de 91, 86, 78 y 78, de los que cinco vivíen en residencia. Dende que principió l'andanciu finaron cola enfermedá causada pol coronavirus SARS-CoV-2 un total de 1.312 persones.

Los hospitalizaos con confirmación o sospecha de COVID-19 son 271, a los qu'hai que sumar otres 69 que tán na UCI. Son 37 y 8 menos que'l martes, de manera respeutiva.

25 biltos activos

Asturies informó al Ministeriu de Sanidá de la esistencia de 25 biltos activos, 8 menos qu'hai una selmana, que sumen un total de 549 casos. 4 d'ellos detectáronse estos 7 díes últimos, comunica Salú.