"La oficialidá ye una imaxe de marca p’Asturies a nivel comercial y turísiticu"

|
Proyeición de 'La vida ensin oficialidá' en Sotrondio

Inaciu Galán destacó nuna conferencia en Sotrondio los aspeutos positivos que tendrá declarar oficial la llingua asturiana.

El presidente d'Iniciativa pol Asturianu punxo la charra '¿Por qué ye necesaria la oficialidá del asturianu? Drechos llingüísticos n'Asturies' na Casa la Mocedá, eventu entamáu pola Oficina de Normalización Llingüística de Samartín del Rei Aurelio que tuvo prepresentáu por Lluis Aique Iglesias, téunicu responsable del SNL. "Güei –por ayeri– recordamos en Sotrondio que la oficialidá del nuesu idioma ye una manera pa xenerar imaxe de marca p’Asturies, daqué que nestos momentos ye mui importante y mui interesante, amás nun llugar como ye la cuenca minera”.

"La oficialidá va valir pa garantizar la igualdá y la llibertá pero tamién ye importante tener en cuenta que va atrayer consigo un crecimientu de l’autoestima colectiva que tanto precisa Asturies”, siguió Galán, qu'añadió que "ye amás una imaxe de marca p’Asturies a nivel comercial y turísiticu. Pa Iniciativa pol Asturianu, un patrimoniu cultural del altor d’un idioma ye un elementu clave pa dase a conocer nel mundu y ser atractivos al visitante”.

L'escritor y periodista apuntó que “tamos faciendo esta campaña pa demostrar con argumentos y rempuestes el motivu pol que la oficialidá ye llibertá y una forma de protexer un patrimoniu dando seguridá xurídica a les persones que quieren falar asturianu en diferentes ámbitos. Nun hai nada más constitucional que facer cumplir precisamente la Constitución, que da un mandatu claru: les llingües sedrá oficiales”. Por último aseguró que "nun entendemos cómo dalgunos pueden presumir de defender la Constitución y al mesmu tiempu negar la puesta en práctica de la mesma”.

L'actu comenzó cola proyeición del documental ‘La vida ensin oficialidá: les consecuencies de la falta de drechos llingüísticos n’Asturies’ que cuenta dalgunos de los munchos casos de discriminación que vivieron y viven ciudadanos nel país por emplegar l'asturianu.

Na semeya, un momentu de la proyeición de ‘La vida ensin oficialidá: les consecuencies de la falta de drechos llingüísticos n’Asturies’ ayeri na Casa la Mocedá de Sotrondio.

Contador Estadistiques