Iniciativa pol Asturianu sigue divulgando per Asturies por qué ye necesaria la oficialidá

Sotrondio acueye una conferencia y la proyeición del documental 'La vida ensin oficialidá' sobre casos de discriminación.

Baxo'l nome de '¿Por qué ye necesaria la oficialidá del asturianu? Drechos llingüísticos n'Asturies' Iniciativa pol Asturianu ta esplicando en dellos puntos d'Asturies les realidaes del procesu de cooficialidá de la llingua asturiana. Depués d'Uviéu'l turnu agora ye pa Samartín del Rei Aurelio gracies a la invitación de la Oficina de Normalización Llingüística d'esti conceyu de la cuenca'l Nalón.

Inaciu Galán, presidente de la organización, va encargase de poner la charra, que va tar presentada por Lluis Aique Iglesias, téunicu responsable del SNL llocal. P'abrir l'actu amás va proyeutase'l documental ‘La vida ensin oficialidá: les consecuencies de la falta de drechos llingüísticos n’Asturies’, fechu a costafecha por Iniciativa pol Asturianu y Cuatro Gotes Producciones pal Seminariu ‘Oficialidá, el camín constitucional pal futuru del asturianu’ entamáu nel Edificiu Históricu de la Universidá d’Uviéu en marzu.

La Casa la Mocedá de Sotrondio va ser la sede d'esti eventu a les 19 hores d'esta tarde. Tola ciudadanía de Samartín y del valle ta convidada a participar "pa conocer tolo qu’implica un procesu de cooficialidá dende’l puntu de vista llegal, económicu, educativu y de drechos humanos. Sedrán bien recibíes toles opiniones que se manden del respetu mutuu y que sirvan pa tener un diálogu na sociedá sobre un problema que acarretamos dende hai 40 años y que necesita una solución", espliquen los organizadores.