"La nuesa identidá y la nuesa llingua pueden ser motor pal turismu", señala Castañón

La vocera axunta de Xuníes Podemos nel Congresu tuvo en FITUR nel Día d'Asturies, onde defendió la oficialidá del idioma.

"Nun hai un únicu modelu de turismu y de fechu Asturies ye una tierra mui propicia pa que se pueda dar un turismu que sía de calter cultural, paisaxísticu... Un turismu de salú tamién pa poder desendolcar actividaes deportives y, dientro d'esa visión cultural, entendemos tamién que la nuesa propia identidá y la nuesa propia llingua pueden ser motor tamién pa esi turismu qu'esperamos", apuntó Sofía Fernández Castañón, qu'añadió que "ye un bon momentu pa poner de relieve la necesidá d'un reconocimientu de la oficialidá de la llingua asturiana porque yá ta demostrao por munchos informes que tamién xenera riqueza y que tamién pue ser un impulsu pal turismu d'Asturies".

Enantes, la vocera de Podemos na Xunta Xeneral, Lorena Gil, desplazada a Madrid p'acudir a la Feria Internacional de Turismo (FITUR), defendió apostar por un modelu turísticu "sostenible que tenga en cuenta el valor paisaxísticu de la nuesa xente, el valor cultural que tenemos n'Asturies. El Gobiernu esti añu dedica'l so puestu n'IFEMA a la promoción de los caminos de Santiago de cara al Xacobéu 2021 y dende la formación morada demanden "una inversión superior en mantenimientu d'esos caminos", non sólo p'atraer pelegrinos y turistes, sinón tamién "p'ayudar a fixar población".

Piñán y Barbón, tamién en Madrid

La celebración del Día d'Asturies fixo qu'Adrián Barbón, presidente del país, y Berta Piñán, conseyera de Cultura, Política Llingüística y Turismu, acudieran per segundu día siguíu a FITUR. Dambos tuvieron acompañaos pol conseyeru d'Industria, Emplegu y Promoción Económica, Enrique Fernández; el conseyeru de Desarrollu Rural, Agroganadería y Pesca, Alejandro Calvo; y la viceconseyera de Turismu, Graciela Blanco.

Barbón visitó'l puestu d'Asturies en FITUR y intervino nel actu institucional ellí celebráu, onde destacó les cifres récor de llegada de turistes al país y afirmó que "el turismu avanza con bon rumbu y Asturies yá prepara los meyores caminos". Tanto él como Piñán atendieron a medios radiofónicos asturianos desplazaos a Madrid, nel casu de la conseyera emplegando la llingua asturiana nes entrevistes.

Na semeya, puestu d'Asturies nesta edición de FITUR.