El Programa Xacobéu 2021, apuesta turística d'Asturies en FITUR

El Gobiernu usa l'asturianu pa nomar esti plan pa dinamizar los caminos asturianos.

"Tamos embarcaos nun programa d'actividaes esceicional na nuesa historia reciente, que permitirá asitiar les rutes asturianes de Compostela nel llugar protagonista que por historia y realidá actual correspuenden-y”, aseguró Berta Piñán, conseyera de Cultura, Política Llingüística y Turismu esta mañana na Feria Internacional de Turismo (FITUR) que principió güei en Madrid. Refierse al 'Programa Xacobéu 2021', que supón, en términos xenerales, la execución d'una serie de midíes diseñaes nel 'Libro Blanco del Camino de Santiago del Principado', estructuráu al rodiu de diez llinies d'actuación y cerca d'un centenar d'aiciones concretes, de les que 24 van entamase esti añu.

L'esfuerciu inversor nes aiciones de promoción turística ye'l más destacáu del plan en cuanto a la cantidá, 828.500 euros de los 1.039.500 euros previstos pola conseyería, pero'l proyeutu inclúi una programación cultural ambiciosa qu'aprovecha y promueve sinerxes colos conceyos venceyaos al Camín de Santiagu y cola alministración del Estáu. El programa cuenta tamién con partíes económiques destinaes a la execución d'actuaciones de mantenimientu en diversos tramos del Camín y diferentes midíes que tienen que ver cola ameyoramientu de la señalizacion, la regulación del funcionamientu de los albergues ensin ánimu d'arriquecimientu, el sofitu a los proyeutos d'innovación teunolóxica o la seguridá nes rutes asturianes.

34.734 pelegrinos

Piñán quixo destacar el caráuter monográficu del puestu d'Asturies en FITUR, dedicáu a los Caminos de Santiago asturianos dafechu, que l'añu pasáu recibieron 34.734 pelegrinos, la cifra más alta rexistrada hasta la fecha, cantidá que representa cerca del 10 por cientu del total de los pelegrinos a la capital gallega. El plan tien previstes delles campañes de calter internacional p'averar les rutas a potenciales mercaos esteriores, como Canadá, Éire, Corea o Xapón.