La novela prieta n’asturianu amplía’l so catálogu con ‘Los crímenes de Pumarín’ de González-Quevedo

Tres la esitosa ‘Sangre na braña’, Roberto González-Quevedo sigue trabayando la novela prieta con ‘Los crímenes de Pumarín’, que lleva’l suxeridor apellíu ‘¿Por qué maten a los profesores?. L’autor de Palacios del Sil emplega nesta ocasión l’asturianu central.

Tres la espublización recién de 'El faru de Gram' (Saltadera), de Manuel García Menéndez, esti xéneru sigue aumentando’l so catálogu na lliteratura asturiana con obres de calidá. González-Quevedo asoleya cola editorial Los Osos de Pesicia una novela que tresllada a los barrios de Pumarín de Xixón y Uviéu una historia d’asesinatos a maestros qu’asusten a los vecinos de les dos ciudaes.

“Nun son crímenes vulgares, sinón que tienen munchos rasgos de crueldá y d’intriga. Amás, los muertos son profesores. El comisariu Dalgliesh-Muxivén ayuda na investigación y al final resuélvese’l misteriu de los sorprendentes crímenes”, adelanta l’escritor, qu’añade que “pela novela van pasando aspeutos de los pensamientos y de la vida de profesores y alumnos nos centros d’enseñanza y nos barrios, afilvanaos pola investigación policial”.

Presentación n’Uviéu

La obra de González-Quevedo va presentase esta tarde, a les 20 hores, nel Salón de Té del Teatru Campoamor. Amás del autor van participar Genaro Alonso, conseyeru d’Educación y Cultura; Roberto Sánchez Ramos, conseyeru de Cultura; y l’ilustrador Ernestos García del Castillo ‘Neto’, mentes que Bárbara González-Quevedo Pedrayes va poner la nota musical al violín.