La movilización feminista colapsa Mieres el 8-M

Tornó a facelo, nesta ocasión fuera de Xixón o Uviéu, en Mieres. El movimientu feminista fixó un añu más el 8-M, Día Internacional de la Muyer, una demostración de fuercia y colapsó con una asistencia de miles de persones esta villa de la cuenca d’El Caudal con un mensaxe de diversidá y un lema de nidiu orixe mineru: ‘Compañera, dame tira’.

Les duldes que podría haber de descentralizar una convocatoria que se venía celebrando nes grandes poblaciones del país quedaron pronto resueltes. La movilización d’autocares y vehículos particulares pa desplazase a Mieres provocó importantes restricciones nos momentos previos de la marcha, que tomó salidá del Pozu Barreo con decenes de pandereteres animando la marcha tres la cabecera y el primer de los bloques feministes.

Foron miles les persones que fixeron el percorríu dende esti puntu al campus universitariu, onde tuvo llugar la llectura del manifiestu d’Asturies Feminista 8-M, coleutivu organizador de la movilización, que pela mañana yá entamara concentraciones en numberoses places de cases conceyu del país. Pa finar, cantóse l’himnu de la convocatoria d’esti añu, tema n’asturianu de nome ‘Compañera, dame tira’ compuestu pola Brigada Feminista y la Escuela Tradicional de Mieres, y hebo la participación musical d’Algaire o 6 Riales.

Un ésitu más del movimientu feminista nuna cita marcada pola diversidá y la pluralidá y la clara referencia al movimientu obreru, dende la escoyeta de llugar de la manifestación hasta’l lema emplegáu. “Compañeres, dámosvos tira’, esclamóse en referencia a les migraes; a les muyeres con diversidá funcional; a les habitantes del ámbitu rural; a les xitanes; a les víctimes d’esplotación sexual, llaboral y a les de violencia psiquiátrica; a les muyeres LBTI+; a les mayores na defensa de les pensiones; a les preses; y a les activistes, amás de nun faltar el recuerdu a toles muyeres asesinaes: “Compañeres, daisnos tira, les vueses vides llaten nos nuesos corazones”.

Na semeya, cabecera de la manifestación.