8-M, Día Internacional de la Muyer: “Compañeres, dámosvos tira”

La marea malva en defensa de los derechos de les muyeres y la igualdá toma otru 8-M les places y cais d’Asturies. Ye’l Día Internacional de la Muyer y el movimientu feminista convoca una xornada reivindicativa baxo’l lema ‘Compañera, dame tira’ que va tener el so puntu central nuna gran manifestación en Mieres.

“Nestos tiempos reaccionarios onde los discursos del odiu atopen el so altavoz, nosotres, xuntes, xuníes, ocupamos les cais de Mieres, cuna de la llucha obrera na nuesa tierra. Impulsaes pol pesu de la nuesa historia y cola mirada puesta en construyir un futuru meyor pa toles muyeres, tamos güei equí demostrando, más que nunca, que somos compañeres y venimos dando tira”, empondera’l manifiestu d’esti añu d’Asturies Feminista 8M, convocante de la marcha que va tener salida a les 19 hores del Pozu Barreo.

Ente les demandes que se rescamplen esti 8-M ta “el fin de la violencia institucional” y de “la xusticia patriarcal y sistémica”, el derechu “al albuertu llibre, seguru y de baldre”, “un sistema educativu públicu, feminista y en diversidá qu’eduque nel consentimientu, el derechu al refugu y la decisión, y fomente les relaciones de bonos tratos, o un “sistema públicu de pensiones xustu y suficiente pa les pensiones mínimes, tanto contributives como non contributives”. Nun podía faltar un recuerdu “a toles muyeres asesinaes” nun testu nel qu’hai amueses de solidaridá coles migrantes o les xitanes, sofitu a les muyeres con diversidá funcional o les que viven n’ámbitos rurales, y refugu “a la esplotación llaboral y la violencia económica” o “les diverses formes d’esplotación sexual y les múltiples violencies y agresiones sexuales que vivimos munches muyeres, moces y neñes nel mundu”.

Pa finar, recuerden que “xuntes somos más fuertes; xuníes, imparables; valientes pa mirar siempre alantre; solidaries pa nun dexar a naide atrás. Dando tira, como tamos faciendo güei, vamos construyir ensin dulda un futuru feminista al altor de los nuesos suaños”. "Compañeres, dámosvos tira", resumen.

Concentraciones frente a les cases del conceyu

Al meudía tamién hai convocatories nes places de la casa conceyu de diferente puntos del país con motivu del Día Internacional de la Muyer. Asturies Feminista 8M entama concentraciones en Llanes, Ribeseya, Parres, Cangues d’Onís, Piloña, Caravia, Uviéu, Llangréu, Siero, Ayer, Ḷḷena, Avilés, Castrillón, Corvera, La Ribera, Llanera y la propia Mieres, mientres qu’en Ribadeva l’actu va tener llugar a les 12.30 hores.

Convocatoria alternativa y movilización estudiantil

El coleutivu Libres y Combativas, pela so parte, organiza una convocatoria alternativa baxo'l lema 'Basta ya de violencia machista y justicia patriarcal' xunto col Sindicato de Estudiantes, CNT Xixón, Izquierda Revolucionaria y la Plataforma SAD Asturias al contar con diferentes puntos de vista en dellos temes. Va ser en Xixón, a les 19 hores, con salida dende la plaza de toros.

En Xixón y Uviéu van celebrase les manifestaciones estudiantiles convocada pol Sindicato de Estudiantes, que llama a la fuelga feminista nos centros educativos del Estáu. Ye al meudía n’El Parchís y na Escandalera, de manera respeutiva.

Na semeya, un momentu de la manifestación del 8-M pasáu en Xixón.