La Mesa del Congresu nun permite qu’Amaiur tenga grupu propiu

Amaiur va ser parte del grupu mistu tres la decisión de la Mesa del Congresu de refugar que la coalición abertzale tuviera grupu parllamentariu propiu. Mentes, dio lluz verde al formáu por Foro de Ciudadanos y Unión Progreso y Democracia (UPyD).
 
Los cuatro votos populares, con mayoría na Mesa, foron los únicos contrarios a la solicitú d’Amair, yá que los dos representantes del PSOE y el de CiU astuviéronse tres quexase del informe xurídicu presentáu polos lletraos. La formación abertzale, con 7 diputaos ente Euskadi y Navarra, nun cumplía el 15 por cientu esixíu por circunscripción al rexistrar un 14,86 por cientu del total de votos na comunidá foral. N’otres ocasiones similares la Mesa del Congresu permitía la conformación de grupu parllamentariu propiu, anque esta vegada'l PP refugábalo, polo qu’Amaiur optó pola fórmula de crear grupu namái colos seis diputaos d’Euskadi. Agora, tienen 24 hores –hasta les 20 hores– de mañana pa recurrir la decisión de la Mesa.
 
Otra manera, sí permitió a UPyD la formación de grupu parllamentariu propiu gracias al apoyu del diputáu de Foro de Ciudadanos, Enrique Álvarez Sostres. Sicasí, la intención del políticu asturianu ye pasar al grupu mistu, onde va tener de compañeros a UPN, CC, BNG, ERC, GeroaBai y Compromís-Equo.