La medra del paru contiénse en mayu: de los 6.342 desemplegaos más d’abril pasamos a 67

La llixera reactivación económica provocada pola desescalada permitió frenar la destrucción brutal d’emplegu vivida en marzu y abril, con 10.853 paraos más. Nel mes de mayu la llista de desemplegaos medró en 67 persones, poniendo’l total en 83.860.

L’aumentu nos 31 díes últimos foi del 0,08 por cientu, porcentaxe más baxu que la media estatal, del 0,69 por cientu, con 26.573 paraos más pa poner el total en 3.857.776. La mengua mayor diose n’Estremaúra (3,51 por cientu) y Castilla-La Mancha (2,55), mentes los aumentos más fuertes rexístrenlos la Comunidad de Madrid (3,54) y Catalunya (3,28), dos de les trés autonomíes más retrasaes na desescalada.

La contención del paru notóse sobre manera dende’l 18 de mayu, cuando Asturies entró en fase 1, con una disminución de los demandantes d’emplegu en 556 persones: de les 84.487 persones rexistraes esi día pasamos a 83.931 contabilizaes el 29 de mayu, último día hábil del mes.

Les cayíes mayores diérsonse na construcción (253 y na industria (35), sectores mui afeutaos en marzu y abril. El mayor incrementu del paru prodúxose nel coleutivu ensin emplegu anterior, con un crecimiento del 2,23 por cientu.

Illes Balears, un aumentu del 92,02 por cientu nun añu

En comparanza con hai un añu, Asturies cuenta con 13.663 paraos más, esto ye una crecimientu del 19,46 por cientu, siendo la media estatal del 25,27. Illes Balears, que’l mes pasáu sufría una medra del 62,18 por cientu, nesta ocasión algama una cifra entá más dura: un 92,02 por cientu.

Les siguientes na llista son Navarra (31,58 por cientu) y Catalunya (30,20). Les cifres d’aumentu más baxes, amás de les que tienen les ciudaes autónomes de Melilla (1,76) y Ceuta (4,22), son les de Castilla-La Mancha (16,04) y Estremaúra (18,70).

Aumentu de les contrataciones n’Asturies

Los datos del Ministeriu de Trabayu y Economía Social reflexen que n’Asturies hebo 10.109 contrataciones en mayu, 2.881 más que n’abril, lo que supón un aumentu del 39,86 por cientu. D’ellos, 1.204 foron indefiníos.

No que respeuta a l’afiliación a la Seguridá Social, el númberu de cotizantes asitióse en 351.008, lo que supón que’l sistema rexistró un aumentu de 2.041 persones. Esti datu contrasta colos 8.528 que’l país perdió n’abril, primer mes completu col estáu d’alarma, y colos 11.578 d’ente los díes 12 y 31 de marzu.

Semeya propiedá de Pool Moncloa.