La crisis sanitaria provoca un aumentu del paru en 6.342 persones

El paru medró n’Asturies n’abril del 8,19 por cientu, más que la media estata, asitiada nel 7,97 por cientu. 83.793 persones demanden anguaño emplegu nel país tres rexistrar 6.342 paraos más nel mes últimu por cuenta de la crisis sanitaria provocada pola pandemia de COVID-19, cifres asemeyaes a les del 2017.

El comerciu minorista, hostelería y hotelería, servicios d’emplegu o educación concentren les xubes más relevantes, anque tamién se rexistraron aumentos por encima de la media na industria (9,71 por cientu) y la construcción (12,12 por cientu). La incidencia de la crisis sanitaria obsérvase d’igual forma na evolución de la contratación, anque a pesar del confinamientu y la hibernación de la economía hebo colocaciones nueves, en concreto 7.228 contratos (11.676 menos qu'en marzu y 24.365 menos qu'hai un añu).

Otra manera, el númberiu d’afiliaos a la Seguridá Social descendió en 8.529 persones. Esto supón una baxada del 2,37 por cientu, hasta asitiase en 350.997, 13.439 menos que n’abril del 2019.

Les más turístiques, les más afeutaes

Los 83.793 paraos lleven al país a tener cifres asemeyaes a les d’hai 3 años. Nel conxuntu del Estáu los demandantes d’emplegu son 3.831.203 tres sumar en marzu 282.891 más.

Les autonomíes onde más medró’l paru son trés de les más turístiques: Illes Balears (15,57 por cientu), Catalunya (12,17 por cientu) y Canarias (12,01 por cientu). Mentes, el crecimientu más baxu dase n’Extremadura (2,45 por cientu) y Andalucía (3,49 por cientu), amás de Melilla (1,63 por cientu).

Un 15,81 por cientu más qu’hai un añu

En términos interñales Asturies cuenta con 11.437 desemplegaos más, lo que supón un aumentu del 15,81 por cientu, inferior a la media estatal, del 21,10 por cientu. Illes Balears rexistra una medra del 62,18 por cientu, más que’l doble de la segunda de la llista, Andalucía con un 25,57 por cientu, mentes que Murcia (13,64 por cientu), xunto con Melilla (0,88 por cientu) y Ceuta (3,89 por cientu), zarra la llista.