La Llegra saca dos modelos de pantalones

Son curtios y tienen un diseñu nel que rescampla una rapacina fotografiada nel 1937 en Sebares llevantando'l puñu.

Llueu del gran ésitu de les camisetes deportives d'Asturies asoleyaes l'añu pasáu, el Llar La Llegra saca material nuevu. Nesta ocasión son dos modelos de pantalón pa salvar el calor del branu.

Entrambos cuenten na parte izquierda con una semeya datada nel 1937 d'una moza del Orfanatu Félix Bárcenas, pa fíos de milicianos, asitiáu en Piñoña, en concreto en Sebares. Ésta sal llevantando'l puñu y, nel diseñu pa la prenda, apaez xunto con símbolos emplegaos por La Llegra que carautericen esti espaciu, como'l soberanismu o'l feminismu.

El so preciu ye de 15 euros y la xente interesao pue facese con estos pantalones contautando al traviés de les redes sociales d'esti centru autoxestionáu, que güei va tar abiertu de 17.30 a 19 hores. Les perres recaudaes van destinase a financiar les actividaes entamaes a lo llargo del añu nel llocal de la cai uvieína El Postigu Baxu númberu 40.