La Llegra entama una campaña de socios pa poder siguir cola so actividá

35 socios ye’l númberu mínimu que necesita’l Llar La Llegra pa poder siguir col so llocal abiertu y, asina, cola so actividá. Por ello entama la campaña ’35 socios, 35 díes’, na que piden el sofitu de la ciudadanía con aportes flexibles que van dende los 5 euros.

“D'esta manera queremos non solo consolidar l'espaciu, sinón tamién tener la posibilidá de sofitar a otres organizaciones de la nuestra redolada cuando lo necesiten (campañes, represión, etc.)”, espliquen dende La Llegra. La campaña, iniciada’l martes, va allargase hasta’l 1 d’agostu, y nes sos primeres hores ta teniendo una mui bona acepción.

Inauguráu’l 13 de marzu del 2015 gracies a l’aportación de más de 140 ciudadanos al traviés d’una campaña de cuestación pela rede, esti espaciu soberanista acoyó mientres estos más de dos años decenes de charres, presentaciones, campañes, esposiciones, proyeiciones y conciertos. Les persones interesaes en facese socies del Llar La Llegra y sofitar el proyeutu pueden ponese en contautu colos sos responsables al traviés del corréu electrónicu espaciulallegra@gmail.com o pela so páxina de Facebook.