El Llar La Llegra inaugúrase esti vienres

Uviéu va contar con un especiu autoxestionáu pola izquierda soberanista asturiana dende esti vienres. Tres dellos retrasos poles obres de remodelación del llocal, El Llar La Llegra yá ta preparáu pa la inauguración de mañana y p’acoyer la so primer actividá’l sábadu, una xornada feminista entamada por Darréu que va contar cola participación d'Anita Sirgo.

L’esfuerciu de los miembros del Espaciu La Llegru, güerfanos de sede dende’l desallugu del Centru Social Autoxestionáu Okupáu La Madreña, y l’apoyu económicu algamáu al traviés d’una campaña de cuestación popular pela rede permiten que’l Llar La Llegra sía una realidá. Un llabor importante que mañana tien la so recompensa cola inauguración oficial del llocal asitiáu na cai Postigo Baxo númberu 40 a partir de les 19 hores. Esti actu va principiar con una presentación breve del Llar La Llegra, pa siguir cola esposición de les esperiencies d’otros centros sociales asturianos y finar con una espicha de confraternización.

Esti espaciu plural pa la reflexión y l’aición coleutiva de la izquierda soberanista asturiana yá tien programaes delles actividaes a lo llargo del mes, siendo la primera una xornada feminista entamada por Darréu y convocada pal sábadu. El vienres 20 ta prevista una conferencia de Xosé Lluis García Arias de nome ‘De Conceyu Bable a güei, 40 años de reivindicación llingüística n’Asturies’, mentes que’l miércoles 25 el tema a tratar será’l casu de los cinco mineros de Zarréu condenaos a cárcel por socorrer a trés compañeros, pa lo que La Llegra convidó a miembros de ¡Asturies en Pie!. Pa zarrar el mes, el sábadu 28 va recordase a Iñigo Cabacas, aficionáu de 28 años d’edá del Athletic Club que resultó muertu nel 2012 tres recibir un impautu de la Ertzaintza con una pelota goma tres un partíu de Lliga Europa del club vascu contra’l Schalke 04.

La folixa prevista pa les persones que contribuyeron económicamente a la remodelación y puesta en marcha del Llar La Llegra ta prevista pal vienres 3 d’abril. Nella, los collaboradores recibirán les recompenses ofrecíes pol so sofitu a la causa. Nun primer momentu, los responsables de la iniciativa solicitaben 3.000 euros, una cantidá qu’a les 25 hores yá teníen cubierta cuasi a la metá: 1.380 euros. Al final, la recaudación al traviés plataforma Verkami en 40 díes foi de 4.215 euros gracies a les aportaciones de 138 persones de dientro y de fuera d’Asturies.

Xornaes Feministes

La primer actividá del Llar La Llegra van ser les Xornaes Feministes de Darréu. Éstes van principiar al meudía del sábadu con una decoración del llocal con motivos feministes, yá qu’esti espaciu “tien el firme enfotu de nun dar cabida a nenguna seña de machismu”. Pa les 16.30 hores ta previstu un alderique sobre los oríxenes y historia del feminismu, la situación llaboral de la muyer y l’actualidá del movimientu nel país y, dos hores más tarde, la proyeición del curtiumetraxe ‘A golpe de tacón’, dedicáu a la llucha de les muyeres na fuelga minera del 62. Anita Sirgo, una de les participantes nesa movilización, va contar la so esperiencia darréu.

“Dende Darréu queremos contribuyir a siguir deprendiendo y construyendo alrodiu d’una temática tan importante, asina como espardiendo la concencia de que la llucha pola igualdá de xéneru, pol fin del patriarcáu, ye daqué imprescindible ya irrenunciable si queremos construyir una Asturies verdaderamente llibre ya igualitaria”, apunten.