La incidencia nos cinco conceyos que tuvieron n'alerta baxó a la metá

Esti llunes rexistráronse 52 casos nuevos de COVID-19 y la muerte d'un home de 90 años.

La Comisión de Siguimientu integrada por los alcaldes de Parres, Cangues d'Onís, Ribeseya, Llanes y Cabrales –los cinco conceyos que tuvieron n'alerta naranxa dende'l 26 d'agostu hasta'l 8 de setiembre–, la Federación Asturiana de Conceyos, la Conseyería de Salú y la Delegación del Gobiernu estatal n'Asturies estudió la situación actual del COVID-19 nestos llugares. Salú informó de la disminución de los casos na zona, con una incidencia que baxó hasta la metá dende que se decretó l'alerta.

No que respeuta a los datos diarios sobre la situación de la pandemia de COVID-19, detectáronse ayeri 52 contaxos, que ponen el total de la serie en 4.094. Los positivos nuevos son asintomáticos o presenten síntomes leves, polo que permanecen n'aisllamientu nos sos llares, y trés tán venceyaos con centros sociosanitarios.

Otra manera, ayeri hebo que llamentar una muerte más cola enfermedá causada pol coronavirus SARS-CoV-2, la 346. Trátase d'un home de 90 años que taba ingresáu nel Hospital Universitariu Central d'Asturies y que nun tenía rellación con nenguna residencia.

47 hospitalizaos

Produxéronse amás 3 ingresos hospitalarios nuevos y 1 na UCI, que se correspuenden con casos diagnosticaos en díes previos. En planta permanecen poro 36 pacientes y 11 n'intensivos.

Por último, hai que sumar una curación que pon el total d'altes epidemiolóxiques en 2.196.