La hostelería va poder abrir n'horariu normal dende'l sábadu

Esti miércoles rexistráronse 2.160 casos.

El Gobiernu va permitir a la hostelería abrir hasta'l so horariu de llicencia dende esti sábadu. Nesti momentu namái pue abrir hasta la 1, sacante terraza.

Dende esta medianueche l'ociu nocherniegu va poder trabayar llueu d'un mes de restricciones, cola novedá de que tamién va poder usar les barres. La esixencia del pasaporte COVID-19 pal accesu nos establecimientu fina d'igual forma.

Cinco muertes

Los contaxos siguien baxando de forma moderada. Ayeri detectáronse 2.160 positivos, 70 menos que'l día anterior, cuando se comunicaron 2.230 –2.236 nos datos oficiales llueu d'una revisión–.

Hebo que llamentar cinco muertes na xornada: trés muyeres de 99, 91 y 89 años y dos homes de 71 y 60. No que va d'andanciu acumúlense un total de 2.287 perdes cola enfermedá causada pol coronavirus SARS-CoV-2.

Tán hospitalizaes 434 persones, poles 440 del martes. Esta cantidá repártese en 387 en planta, 8 menos, y en 47 na UCI, 2 más.

Na semeya, Lidia Clara Rodríguez, direutora xeneral de Salú Pública, y Miguel Prieto, xefe d'Alertes y Emerxencies, na convocatoria onde esplicaron les novedaes respeuto a les restricciones.