La FSA axunta a 28 personalidaes del mundu cultural y políticu pa qu’espresen les sos razones pa sofitar la oficialidá

La Carpa de la Palabra de la Semana Negra va acoyer esti sábadu un actu públicu de la FSA baxo’l nome ‘Sí al asturianu, sí a la oficialidá’. 28 personalidaes del mundu cultural y políticu van espresar en menos d’un minutu les sos razones pa sofitar la oficialidá y l’idioma.

Mariluz Pontón, secretaria d’Educación, Universidaes y Normalización Llingüística de la Federación Socialista Asturiana (FSA), va encargase d’introducir l’actu y de dar pasu a caún de les persones coles que la organización se punxo en contautu. “Queríamos dar voz a la ciudadanía, independientemente del so color políticu, p’amosar l’apoyu social xeneral a la normalización d’una llingua milenaria que ta viva y que necesita que se la protexa como marca la Constitución”, esplica.

Escritores, músicos, actrices, periodistes, empresaries, políticos o sindicalistes conformen esta llista de 28 persones que van a espresar en menos d’un minutu por qué hai qu’oficializar l’idioma. Asina van tomar la pallabra José Alba, José Luis Alperi, Xuan Bello, Amable Concha, Lucía Falcón, Jonás Fernández, Sonia Fidalgo, Ángeles Flórez ‘Maricuela’, Esther Fonseca, Nacho Fonseca, Inaciu Galán, Santiago García Granda, Ismael González, Xosé Antón González Riaño, Laura Iglesias, José Antonio Lobato, Wenceslao López, Berta Piñán, Noelia del Prado, Esther Prieto, Milio’l del Nido, Flavio Rodríguez, Cristóbal Ruitiña, Pilar Sánchez Vicente, Anabel Santiago, Chus Pedro Suárez, Eva Vallines y Naciu Varillas.

“Yá nos pasaron los testos y atopamos auténticos microrrellatos. Hailos mui guapos y de too tipu, dalgunos mirando más a lo sentimental, y creo que va ser un actu mui prestosu y que pega muncho nun sitiu de cultura como ye la Semana Negra y nuna carpa como la de ‘la Palabra’”, asegura Pontón, que destaca tamién la predisposición de tolos participantes tres recibir la invitación.

Cambiu de posición

La FSA camudó la so posición histórica al respeuto la oficialidá del asturianu tres salir alantre una enmienda nel congresu últimu con un 82 por cientu de los votos de los delegaos. Lo sos dirixentes vienen, dende esi momentu, defendiendo una “oficialidá amable” que nun suponga imposiciones.

“Pruyimos por una oficialidá inclusiva, que tenga en cuenta les carauterístiques sociollingüístiques d’Asturies. Un zapatu fechu a la nuesa midida nel que nos sintamos bien”, apunta Pontón, que considera qu’actos como mañana ayuden a visibilizar el refugu de la sociedá a los discursos que tán emplegando los sectores contrarios a la oficialidá.