La Fiscalía abre una investigación nueva n'Illas, agora por un posible delitu d'acosu

Llueu d'una denuncia presentada contra una xefa de serviciu de l'Alministración asturiana y l'alcalde y secretariu del Conceyu pol mesmu vecín que sufre molesties por ruíos. 

Elsa Mesones, fiscal decana de la seición territorial d'Avilés de la Fiscalía d'Asturies, abrió dilixencies d'investigación "por un posible delitu d'acosu del art. 172 del Códigu Penal". Éstes lleguen por una denuncia pol proceder de Fernando Alberto Tirador, alcalde d'Ilas por Convocatoria por Illas, el secretariu Juan Manuel Acebal y María Belén Alonso, xefa de serviciu del Serviciu de Xestión y Calidá Comercial de la Conseyería de Transición Ecolóxica, Industria y Desendolcu Económicu, magar que nel escritu presentáu énte la Fiscalía d'Uviéu, que lu treslladó a Avilés, se solicitaba que s'esclariara la posible comisión d'otros delitos.

El mes pasáu yá abriera otra investigación de posible prevaricación de los dos responsables del Conceyu, pola desapaición, supuestamente de forma intencionada, d'un informe de medición de ruíos a un establecimientu hosteleru. Ésti, apegáu a la vivienda familia del denunciante, ta creando-y molesties, "un acosu y persecución" que, apunta'l documentu presentáu a Fiscalía, "consiste en ruíos qu'altieren y impiden el mio descansu, insultos, amenaces, agresiones y denuncies (hasta 65 persones, non toes residentes nel pueblu, firmaron va poco una denuncia por acosu, que recién me comunicó, va unes selmanes, l'abogada que foi archivada)".

Según detalla la denuncia, que se centra na "posición y comportamientu por parte del Conceyu d'Illas" y el proceder de la xefa de serviciu, el vecín presentó un total de 76 nel Rexistu municipal énte la conseyería por incumplimientu d'horariu y condiciones del negociu hosteleru, comerciu y bar, ensin atopar respuesta. Esta situación llevólu a unviar una certificada con acuse de recibu, con contestación firmada pola propia Alonso.

Ye l'entamu d'una llarga serie de comunicaciones, con diferencia de criterios y torgues p'aceptar pruebes gráfiques, que lleva al vecín a concluyir que los funcionarios "tienen l'únicu interés de nun dar solución a un problema que causa daños y sufrimientu, y que s'allarga nel tiempu", motivu de presentación de la denuncia a la Fiscalía, que decide abrir una investigación.