La Escuela Paisana da perspeutives nueves en Cabranes a la cultura tradicional asturiana

Trés charres a cargu de Damián Barreiro, Leticia Baselgas y Margarita Fernández Mier conformen esta iniciativa nueva na Casa Conceyu.

El Serviciu de Normalización Llingüística de la 'Comarca de la Sidra', en collaboración col Ayuntamientu de Cabranes, entama la Escuela Paisana, "un ciclu de charles n’asturianu que ñaz cola idea d’aportar perspeutives nueves a aspeutos diversos de la cultura tradicional asturiana". Van tener llugar nos trés xueves próximos, siempre a les 19 hores.

La primera d'elles va protagonizala esta tarde Barreiro, periodista y responsable de la canal de YouTube 'Horros & Frixuelos', que va falar de 'L'asturianía kitsch: de la Santina a les madreñes'. La selmana viniente va ser el turnu de la componente de L-R y doctora n'Historia del Arte, Leticia Baselgas, con 'Cantar, baillar, tocar la pandereta. Les otres histories de la música asturiana', pa pesllar la Escuela Paisana'l día 15 Fernández Mier, medievalista y arqueóloga de la Universidá d’Uviéu, cola intervención 'Los olvidaos de la historia. Cómo averase al campesináu a traviés de l'arqueoloxía'.

Cada sesión d'actividá en Santolaya va tar complementada poles Memories de Cabranes, onde se compartirán los resultaos de los talleres de recuperación de memoria que’l SNL vien desenvolviendo esta seronda con un grupu de mayores del conceyu.