La economía y servicios rurales y la cultura centren l'alderique del conceyu de l'agrupación llocal d'Aína n'Uviéu

|
Conceyu abiertu de constitución de l'agrupación llocal d'Aína n'Uviéu

La de la capital, qu'axunta tamién a Grau, foi la última en constituyise. La próxima, la d'El Nora.

Aína vive selmanes d'amplia actividá previa a la celebración de la primer Asamblea Nacional del partíu. Delles agrupaciones llocales tán entamando axuntamientos nuevos pa siguir organizándose y otres constitúyense, como ye'l casu de la d'Uviéu, ayeri, o la d'El Caudal y Avilés y contorna, la selmana pasada.

25 persones d'Uviéu y Grau, pero tamién de Quirós o Teberga, axuntárose nel Centru Social d'Otero p'aldericar nun clima "constructivu" marcáu "poles ganes de trabayar en positivo hacia la construcción d’un asturianismu modernu y integrador". Foron munchos los temes puestos enriba de la mesa, pero la economía y los servicios rurales y la cultura ocuparon el mayor tiempu.

"Tres calcar na idea de qu’Uviéu ye, más alló de la ciudá, tamién los sos pueblos, l’alderique tocó al entamu aspeutos relacionaos cola economía y los servicios rurales. La necesidá d’impulsar y fortalecer la industria primaria dende modelos vidables que garanticen el futuru del seutor y el respetu al mediu dende enfoques ecoloxistes foi una esmolición compartida con conceyos celebraos n’otros municipios", apunten dende Aína.

El tresporte, la turistificación y la vivienda salieron a rellucir darréu, pa finar cola cultura y el "so potencial social y económicu pal algame d’una ciudá y una Asturies más dinámica y comprometida cola so realidá". Metanes de febreru ta previstu un alcuentru nuevu d'esta agrupación llocal "pa continuar l’análisis entamáu sobre la situación del conceyu y escomenzar a trabayar en midíes concretes d’actuación".

En Noreña

Pa esta tarde ta previstu'l conceyu abiertu de constitución de l'agrupación llocal d'Aína n'El Nora, qu'abarca los conceyos de Llanera, Siero y Noreña. Na Casa Cultura d'esti últimu ye onde va celebrase esti axuntamientu al que tán llamaes a participar toles persones inscrites pal Congresu Fundacional y tola ciudadanía interesada nesti proyeutu políticu.

Otra manera, el xueves va celebrase un alcuentru abiertu en llinia cola de Xixón a les 19.30 hores.

Na semeya, un momentu del conceyu abiertu d'ayeri n'Uviéu.

Contador Estadistiques