El Caudal, Avilés, Uviéu y El Nora, agrupaciones llocales d'Aína próximes en constituyise

|
Aína Abriendo Camín

Hasta'l momentu yá se conformaron trés.

La campaña #AbrimosCamín d'Aína pa la constitución de les diferentes agrupaciones llocales y la consolidación de les afiliaciones al partíu asturianista d'izquierda en procesu de creación vive les dos selmanes más intenses. Dende güei y hasta'l martes 31 tán convocaos cuatro conceyos abiertos que siguen a los d'El Nalón, Xixón y l'Oriente.

Son los d'El Caudal, Avilés y contorna, Uviéu, y Llanera, Noreña y Siero baxo'l nome de Nora. En total hai 75 persones d'estes zones inscrites pal Congresu Fundacional llamaes a participar nestos alcuentros, nos que tamién pueden participar toles persones interesaes nel proyeutu, pa conocer de mano de los promotores cómo ta desendolcándose'l camín hacia la primer Asamblea Nacional y "aniciar un alderique empobináu a proponer polítiques y formes de trabayu d’interés llocal que dean respuesta a les necesidaes de les parroquies, los barrios y los conceyos".

La Casa Cultura de Mieres ye la primera de les cuatro paraes, con presencia a les 19 hores d'esta tarde de ciudadanes y ciudadanos de Mieres, Morcín, Ayer y Riosa. El miércoles va ser el turnu d'Avilés y contorna, zona na qu'hai inscritos d'Avilés, Castrillón, Corvera, Cuideiru, Gozón y Illas, a la mesma hora nel Centru Sociocultural Los Canapés.

L'agrupación llocal d'Uviéu va constituyise el llunes viniente a les 19 hores nel Centru Social d'Otero, con presencia tamién de persones de Grau, y al día siguiente, a les 19.15 hores, va ser el turnu de los d'El Nora na Casa la Cultura de Noreña.

Contador Estadistiques