La derecha podría gobernar n'Andalucía tres la baxada del PSOE, partíu más votáu

|
Eleiciones Andalucía 2018

La presidenta Susana Díaz pierde 14 escaños, pa quedar con 33. El PP tamién baxa, mientres que Ciudadanos gana 12 y la ultraderecha entra n'escena colos 12 de Vox.

Juan Manuel Moreno, candidatu popular a la presidencia d'Andalucía, considera que nun ha d'haber dificultaes pa pautar con Ciudadanos y afirmó esta mañana que yá hebo contautos, anque lo cierto ye que la pretensión de la formación naranxa ye la de liderar el cambiu n'Andalucía. Como espectador ta Vox, partíu col que paez que'l PP nun tien problema en llegar a alcuerdos, posición contraria dafechu a lo que ta faciendo la derecha en toda Europa pa nun dar xuegu a les posiciones estremistes.

El PP suma, col 99,92 por cientu de les papeletes contabilizaes, 26 diputaos (20,75 por cientu del total de votos), esto ye, 7 menos que nes anteriores, mentes que Ciudadanos algama 21 (18,27 por cientu) y Vox 12 (10,97 por cientu). En total la derecha suma 59 escaños, polos 33 del PSOE (27,95 por cientu) y los 17 d'Adelante Andalucía (16,18 por cientu), la coalición de Podemos, Izquierda Unida Los Verdes-Convocatoria por Andalucía, Izquierda Andalucista y Primavera Andaluza.

L'astención alta foi la otra gran noticia d'esta convocatoria eleutoral, un 41,35 por cientu, dexando la participación nun 58,65 por cientu (nel 2015 foi del 62,30 por cientu). Hebó un 1,58 por cientu de votos en blancu y un 2,20 de nulos.

 

Contador Estadistiques