La delegada del Gobiernu estatal en Madrid diz que’l movimientu ‘Ocupa el Congreso’ ye un “golpe d’Estáu”

El 25 de setiembre ta convocada peles redes sociales una concentración frente al Congresu baxo’l nome ‘Ocupa el Congreso’. Cristina Cifuentes, delegada del Gobiernu en Madrid, califica esta iniciativa como “un golpe d’Estáu tapáu”.
 
Nuna entrevista nel programa ‘El Círculo’ de Telemadrid señaló que los organizadores d’esta aición "busquen la semeya de ciudadanos saltando les valles, una imaxe que perxudicaría enforma la imaxe d'España porque suxer una desestabilización política". A ellos dirixóse pa dici-yos que'l Congresu "ye un llugar inviolable y ta protexíu polos Cuerpos y Fuercies de Seguridá del Estáu énte cualquier tipu d'ataque". "Al mio pensar ye un golpe d'Estáu tapáu y un actu delictivu. Los que tán detrás son grupos bien radicales, tanto de dereches como d'izquierdes", manifestó.
 
"Esto nun va pasar. Nun van entrar nel Congresu, pónganse como se pongan, porque los Cuerpos y Fuercies de Seguridá del Estáu van facer que se cumpla la llei", alvirtió Cifuentes, que ta convencida de que la convocatoria nun va tener un ésitu escesivu "porque la gran mayoría de los españoles nun tienen nada que ver con actuaciones radicales". Por último, detalló que la Delegación de Gobiernu alcontró un grupu de "ente 800 y mil y picu persones que tán en too y son los que provoquen los incidentes".
 
‘Ocupa el Congreso’ ye un movimientu social entamáu por xente anónimo al traviés de les redes sociales que pretende una ocupación simbólica de la cámara baxa de les Cortes Xenerales p’amosar la so disconformidá colos políticos y la situación actual.