La cima Chechu Rubiera va acoyer la I Carrera de Montaña Cotu Beyo

Aficionaos a la bicicleta de toda Asturies van participar el sábadu na I Carrera de Montaña Cotu Beyo, na cima tamién conocida como Chechu Rubiera. Nesi mesmu llugar van celebrase les Fiestes del Corderu’l viernes y el sábadu.
 
La Hermandad de Santa Bárbara de Beyo entama esta carrera ciclista, en collaboración col Club Atletismo Coḷḷlanzo, que va principiar a les 11 hores en Cotu Beyo y que va trescurrir per un circuitu de 10 quilómetros a 1.198 metros d’altor pela zona per pistes de tierra, grava y yerba, nun entornu espectacular. Tol circuitu va tar señalizáu y los participantes van tener a la so disposición bébores y siguimientu per parte de la organización.
 
Esta primer edición de la prueba va tar dividida en dos categoríes: persones con edaes ente los 16 y 40 años, y mayores de 41 años. La organización va entregar trofeos a los trés meyores clasificaos en cada categoría, masculina y femenina, amás d’un premiu en metálicu pa los trés primeros de tolos participantes. La inscripción ye de 5 euros y inclúi, amás de la bébora en carrera, una bolsa con agua, fruta y una camiseta conmemorativa que va entregase en meta. Ésta debe facese, a más tardar, media hora enantes de la salida.
 
Otra manera, esta fin de selmana tamién va celebrase en Cotu Beyo la Fiesta del Corderu, que va principiar el vienres, a les 21 hores, con una espicha amenizada con una actuación musical. Yá de sábadu, tres la entrega de premios de la carrera ciclista, prevista pa les 13 hores, van repartise les raciones de corderu y botelles de vinu p’aquellos que s’inscribieren. A les 17 hores ta prevista una carrera de cintes en quad y, yá de nueche (22.30 hores), una verbena.