La burbuya d'internet (y II)

La burbuya tecnolóxica nun tuvo efectu namás nel Nuevu Mercáu de la Bolsa de Madrid, sinon que toles grandes empreses españoles perdieron munches perres na so aventura na rede de redes. Sólo nel Nuevu Mercáu madrilanu, les perdes de los inversores qu'apostaron por esti sector algamaron los 30.000 millones d´euros nos tres años últimos. El Nuevu Mercáu de la Bolsa madrilana entamó con una capitalización de 37.893 millones d´euros, y güei val menos de 8.500 millones d´euros. El Nuevu Mercáu español, asemeyáu a otros qu´entamaron en otros países, yera otra copia en pequeno del potente NASDAQ norteamericanu. Les crecientes perdes d´estos valores emburriaron a les bolses a piesllar los nuevos mercaos, pero l'españíu de la burbuya d'internet afectó tamién a los grandes valores tradicionales qu'invirtieron bien de perres en proyeutos virtuales.



N´España hebo grandes fracasos empresariales venceyaos a Internet. Ún de los más importantes foi el de la incubadora Ecuality, que tenía portales como Diversia.com o AlCoste.com. Entós yera normal velos anunciase na televisión, pero como munches empreses puntu com los ingresos nun llegaben y los inversores de capital riesgu dexaron de poner les perres. La fía del banqueru Emilio Botín, Patricia Botín, invirtió nel so propiu proyeutu d´Internet: Coverlink. Esta yera una consultora d´Internet que foi a pique neto qu'otres consultores d´Internet internacionales qu'abrieren sedes en Madrid y Barcelona que desapaecieron xunta les cases matrices, casos de BlueC, MarchFirst o 100World



Les consultores y incubadores d´Internet n´España pesllaron o tresformaronse en simples empreses de diseñu web y poco más. Nesti mes d´Abril saltó la noticia de la fusión de les dos más grandes consultores españoles -enantes incubadores- d´Internet que nacieron cola burbuya: Netjuice y Netfinger, qu'agora son empreses de diseñu web y de proyeutos de CRM y ERP fundamentalmente. Pero anguaño los que más tan sofriendo la crisis son los bancos tradicionales con filiales virtuales. El Uno-e del BBVA y Patagon del SCH son un furacu de perres bien grande, y sólo la filial del Banco Popular, el Popular-e, algam´ço un beneficiu pequeñu nel últimu exerciciu. Otru fracasu foi el del arxentinu Martín Vasavsky con Jazztel: esti emprendedor d´ésitu nos tiempos de la burbuya ye güei ex-presidente d´una compañía al borde de la quiebra. De fechu Jazztel cotiza ya a unos pocos céntimos, lloñe de los dos díxitos d´euros que valía de la que salió a bolsa, faciendo perder a los inversores el 99% de la so inversión. Amadeus y Indra son de los pocos valores cotizaos qu'escapen de la quema.

Mientres, otros valores tecnolóxicos, casu de los biotecnolóxicos (con Zeltia a la cabeza) siguen vendiendo fumu. Y el casu ye que los inversores aún dempués del estallíu de la burbuya siguen comprando aiciones de biotecnolóxiques. Llueu de Zeltia salió a cotizar al Nuevu Mercáu Puleva Biotech con una escelente cotización, y hai poco salío la filial de Natra: Natraceutical. Y dientru poco quier salir Probitas Pharma, empresa líder en hemoderivaos. Pero un de los fracasos más escandalosos na bolsa madrilana foi Terra: la filial de Telefónica llegó a cotizar a 150 euros por aición y anguaño nun llega a los 10 euros. Amás, les perspectives de la filial de Telefónica nun son mui bones. Otres empreses bursátiles tamién entamaron proyeutos confergaos al fracasu, asina Cortefiel y Altadis crearon Viaplus.com, una empresa de comerciu electrónicu inviable, mientres per otru lláu el SCH, Sol Meliá y AOL crearon un mega proyeutu nomáu AOL Avant. La idega yera vender a traviés de les oficines del SCH ordenadores non compatibles con nengún sistema informáticu, mui simples y mui llimitaos de prestaciones. Va delles selmanes, un portal de subastes punxo a puya los stocks d'ordenadores que quedaron ensin vender....

N´Asturies ún de los casos más polémicos foi el fracasu del proyeutu de la puntu com serempresa.com, propiedá del empresariu xixonés de Intersoft Dixital. Esti proyeutu embarcó a dellos inversores asturianos y tamién implicó al Ayuntamientu de Xixón, que-y ufiertare delles ayudes publiques. De fechu l'asuntu, conocíu como "casu Intersoft" fizó peligrar la siella de dalgún conceyal xixonés. El proyeutu serempresa.com nun consistía n'otra cosa que en vender per Internet programes informáticos de mala calidá a precios baxos. Estos programes nun daben un bon resultáu, y el negociu real pa la empresa taba en ganar perres a traviés de les llarguísimess llamaes telefóniques con tarificación especial que facíen los usuarios de los programes como consecuencia de la riestra inacabable de problemes que daba'l software de la casa, resultando la cosa un amiestu del "timu de la estampina" y el modelu de negociu de les llinies 906.